ତୁମେ ଆସିଥିଲ
ତୁମେ ଆସିଥିଲ
ତୁମେ ଆସିଥିଲ ଜୀବନେ ମୋହର
ପ୍ରୀତିର ଫଗୁଣ ନେଇ
ମୋ ମନ ମରୁରେ ଫୁଲର ମହକ
ଦେଇଥିଲ ତୁମେ ଢ଼ାଳି ।
ନିରଵତା ଭାଙ୍ଗି ମନ ଇଲାକାରେ
ମଧୁ ଗୁଞ୍ଜରଣ ଦେଲ
ପ୍ରେମ ଜଳ ସିଞ୍ଚି ଶୁଷ୍କ ଜୀବନକୁ
ସତେଜ ତୁମେ କରିଲ ।
ତୁମ ପ୍ରଣୟର ମିଠା ମିଠା ବାସ୍ନା
ମୋତେ ମହକାଇ ଦେଲା
ସପନ ରାଇଜେ ହଜିଗଲି ମୁଁ ଯେ
ପ୍ରୀତିର ଫୁଲ ଫୁଟିଲା ।
ହେଲେ,ସପନକୁ ସତ କରିବା ପୂର୍ବରୁ
ପ୍ରୀତି ଫୁଲ ମଉଳିଲା
ମୋହରି ସପନ ସପନେ ରହିଲା
ତୁମ ପ୍ରେମ କାହିଁ ଗଲା ।
ତୁମରି ମଥାରେ ଆଉ କା ସିନ୍ଦୂର
ଦେଖି ମୁଁ ଚକିତ ହେଲି
ପଚାରିବା ପାଇଁ ଚାହିଁଲି ହେଲେ ମୁଁ
ପଚାରି ପାରିଲି ନାହିଁ ।
ତୁମେ ଆସିଥିଲ ପ୍ରୀତିର ଫଗୁଣେ
ପ୍ରେମର ଇସାରା ନେଇ
ପୁଣି ଚାଲିଗଲ ମୋ ଜୀବନ ଧାରୁ
ଅକୁହା ବେଦନା ଦେଇ ।
ତୁମେ ଆସିଥିଲ ସପନ ରାଇଜେ
ରାଜକୁମାରୀ ଟେ ହୋଇ
ସପନ ଭାଂଗିଲା ନିରବ ଯନ୍ତ୍ରଣା
ଦେହ ମନ ଦେଲା ଦହି ।
ତୁମେ ଆସିଥିଲ ଆଶା ଦେଇଥିଲ
ଆଶା ସୌଧ ଭାଙ୍ଗି ଗଲା
ତୁମ ପ୍ରତାରଣା ମନ ଇଲାକାକୁ
ମରୁଭୂମି କରିଦେଲା ।