ତୁମ ପାଇଁ
ତୁମ ପାଇଁ
କାହିଁ କେତେ ଦିନୁ
ଦୁନିଆର ଭିଡ ମଧ୍ଯରେ
ମୁଁ ବଞ୍ଚୁଥିଲି ଏକା
ସାଙ୍ଗରେ ନେଇ ମୋ ନୀରବତା ।
ମନର ଗଭୀରତମ ସ୍ଥାନରେ
ରହି ଯାଇଥିଲା କିଛି ଅକୁହା କଥା
ଆଉ ଅଜଣା ବ୍ଯଥା ।
ସେଥି ପାଇଁ ବୋଧେ
ହରାଇ ବସୁଥିଲି ତୁମେ ଦେଉଥିବା ଆକର୍ଷଣ
ଆଉ ଭାବପ୍ରବଣତା ।
କେବେ ଭାବି ନଥିଲି
ଜୀବନରେ ଏମିତି ଏକ ଦିନ ଆସିବ
ତୁମ ସହ ଦେଖା ହେବ ।
ତୁମେ ଆସିଲ
ମୋ ନୀରବତା ସହ କଥା ହେଲ
ଠିକ୍ ଏକ ପ୍ରଗଳ୍ଭ ନାୟକଟେ ପରି ।
କେଜାଣି କି ଯାଦୁ ଜାଣିଥିଲ ତୁମେ
ହୃଦୟର ଏଇ ବନ୍ଦ ଫାଟକକୁ ଖୋଲିଦେଲ
ବାରମ୍ବାର ମୋତେ ସମ୍ମୋହିତ କରି ।
ଚୁପି ଚୁପି କାନ ପାଖେ କହି ଗଲ ଆଜି
ମୋତେ କୁଆଡେ ବଞ୍ଚିବାକୁ ଅଛି
ପ୍ରେମିକାଟେ ସାଜି ।
ତୁମ କଥା ମାନି ପ୍ରେମିକା ସାଜିଲା ପରେ ଇଚ୍ଛାହୁଏ
ହରାଇ ଦିଅନ୍ତି କି ନିଜ ସତ୍ତା
ସାଗରେ ତଟିନୀ ପ୍ରାୟେ ।
ମିଶି ତୁମ ଆତ୍ମା ସହ
ହୁଅନ୍ତି କି ଏକାକାର
ମାନ ଅଭିମାନ ଆତ୍ମଗ୍ଳାନୀ ସବୁ ପୋଛିଦେଇ
ମୋ ନୟନୁ ବହି ଯାଅନ୍ତ ତୁମେ
ଲୁହ ସାଜି ଝରଝର ।
ଆଉ ମୁଁ
ଦେହ ମନ ପ୍ରାଣ ସବୁ ସମର୍ପି ଦିଅନ୍ତି
ଦୁନିଆକୁ ଭୁଲିଯାଇ
ତୁମ ପ୍ରେମର ନିଶାରେ ମତୁଆଲା ହୋଇ
ଝୁମି ଉଠନ୍ତି
ବାହୁ ବନ୍ଧନରେ ତୁମକୁ ଚାପିଧରି
ଅନୁଭବ କରନ୍ତି
ସେ ସ୍ବର୍ଗୀୟ ତୃପ୍ତି, ଆଉ ଶାନ୍ତି