ତୁମ କଥା ମନେ ପଡ଼େ କିଆଁ

କାଲି ରାତିରେ ଦେଖିଲି ସପନ, ଉଭା 

ହୋଇଅଛ ସମ୍ମୁଖେ ମୋହର

ମୋ ସ୍ମୃତି ସୌଧରେ ଭାସି ଆସୁଅଛି

ଅସ୍ପଷ୍ଟ ମୁର୍ତ୍ତିଟା ତୁମର ।

ସପନରେ ଅନୁଭବ କଲି ପୁରୁଣା ଦିନର

ଲୋଭନୀୟ ଅନୁପମ ଧାରା

ମୁରୁକି ମୁରୁକି ହସରେ ବେଣୀକୁ ହଲାଇ 

ହଲାଇ ଧାଇଁ ଆସୁଥିଲ ପରା ।

ତୁମକୁ ପ୍ରଥମ ଦେଖାରେ ସ୍ତମ୍ଭିଭୁତ ହୋଇ 

କିଛି କ୍ଷଣ ରହିଲି ସଂଶୟେ 

ମିଶିବା ପାଇଁ ତୁମ ସଂଗେ ଧିରେ ଧିରେ ହେଲି

ଅଗ୍ରସର ସାହସ ବାନ୍ଧି ହୃଦୟେ  ।

ସ୍କୁଲରେ ପହଞ୍ଚି ପିଲାଂକ ମେଳରେ ମନେ

ମନେ ଖୋଜେ ମୁହିଁ ତୁମକୁ 

ନଦେଖିଲେ ଦିନେ ଭରି ଯାଏ ମନରେ ଦୁଃଖ,

ଦେଖାଇବି ଏହି କଥା ଆଉ କାହାକୁ ।

ଅନ୍ୟ କାହାରି ସାଂଗରେ ମିଶୁଥିଲ ଯଦି ମୁଁ

କିପରି ସତରେ ପଡ଼େ ଚମକି 

ମନେ ମନେ ଭାବେ, କହିନଥିଲି କେବେବି,

ଅନ୍ୟ ଛଳନାରେ ନିଏ ତୁମକୁ ଡାକି ।

ଚାଲିଗଲ ମୋତେ ଛାଡି, ମୋ ମନ ମୋହିନୀ 

ଦେଖି ଅନ୍ୟଂକୁ ପର୍ବ ପର୍ବାଣିରେ

ତୁମ କଥା ଭାରି ମନେ ପଡ଼େ, ଭାବେ ତୁମେ

ଅଛ ସତରେ ମୋହର ସଂଗରେ ।

ପ୍ରେମକୁ ତ ଜାଣି ନଥିଲେ, ପ୍ରତିଶ୍ରୁତି ତ ଦେଇନ

ପାଳନ କରିବାର ପ୍ରଶ୍ନ ନଥିଲା

ସେ ଭାବନାରେ ନଥିଲା ପ୍ରତାରଣା କପଟତା 

ଭଣ୍ଡତା ଶଠତା, ପବିତ୍ର ଶାଶ୍ୱତ ଥିଲା ।