ତୁ ଥାଆ ମୁଁ ଯାଉଛି ରୁଷି

         ଟୁଉକୁ ମୂଷି ଟୁକେଇ ମୂଷି

               ଆ' ଯିବା ମେଳା ବୁଲି

         ଜିନିଷ କିଣିବା ମଉଜ କରିବା

               ଖେଳିବା ଦୋଳିରେ ଝୁଲି ।

         ଟୁଉକୁ ମୂଷି ଟୁକେଇ ମୂଷି

                ଆ' ସଜେଇବା ଘର

         ସୁନ୍ଦର ଦିଶିବ ମନ କିଣିନେବ

                ଦେଖୁଥିବା ଯେତେ ଥର ।

         ଟୁଉକୁ ମୂଷି ଟୁକେଇ ମୂଷି

                ଆ' ଲଗେଇବା ଗଛ

         ପାଣି ବୋହି ଦେବା ଯତନ କରିବା

                ଆଉ କାମ କରି ପଛ ।

         ଟୁଉକୁ ମୂଷି ଟୁକେଇ ମୂଷି

                ଆ' ଯିବା ଫୁଲ ତୋଳି

         ନାଲି,ହଳଦିଆ ରଙ୍ଗ ସବୁ ତା'ର

                ଦେହେ ଆଣି ହେବା ବୋଳି ।

         ଟୁଉକୁ ମୂଷି ଟୁକେଇ ମୂଷି

                ଆ' ଯିବା ଖେଳି ଖେଳ

         ତୋଅର ଛୁଟି କି ମୋଅର ବି ଛୁଟି

                ଏ ଆମ ଖେଳିବା ବେଳ ।

         ଟୁଉକୁ ମୂଷି ଟୁକେଇ ମୂଷି

                ଆ' ଯିବା ପାଣି ଆଣି

         ସାଇତିବା ଘରେ ସଫା ମାଠିଆରେ

                ପିଇବା ନିଇତି ଛାଣି । 

         ଟୁଉକୁ ମୂଷି ଟୁକେଇ ମୂଷି

                ଆ' ଯିବା ପଢି ପାଠ

         ଦୁଇ ଚୋଉ କେତେ ପଚାରିଲେ କେହି

                କହିଦେବୁ ବେଗେ ଆଠ । 

         ଟୁଉକୁ ମୂଷି ଟୁକେଇ ମୂଷି

                ଆ' ଯିବା ଦେଖି ପୁଷି

         ଲୁଚିବୁ ଗାତରେ ନ ଯିବୁ ଯେବେ ତୁ

                ଥାଆ ମୁଁ ଯାଉଛି ରୁଷି ।