Library
Profile
ତୁ କେତେ ସୁନ୍ଦର
ତୁ କେତେ ସୁନ୍ଦର
ଆହା ଆଜି ତୋତେ ଦେଖି ଏହି ମନଯାଏ ଲାଖି
ଲାଗୁ ସତେ ତୁ କେତେ ସୁନ୍ଦର
ମନ ତୁ ସଭିଙ୍କ ମୋହି ନେଉ ଆରେ ଫୁଲ
କାଶତଣ୍ଡୀ ପରା ନାମ ଅଟେ ତୋହର |
ତୋର ଆଗମନ ସତେ କିଛି ନୀରବେ କହି ଯାଏ
ପବନ ତୋର ସଙ୍ଗେ ଝୁଲି ଖେଳୁଥାଏ
ହସି ହସି କିଛି କଥା ଚୁପି ଚୁପି କହେ
ଲାଗେ କାହାରି ଆସିବାକୁ ସତେ ଚାହିଁଥାଏ|
କିଏ ଜାଣେ କେବେ ତୋର କେମିତି ହେଲା ଜନ୍ମ
କିଏ ତୋତେ କହିଲା ଆସିବା ପାଇଁ
କିଏ ତୋର ମାଳି କିଏ ନିଏ ତୋର ଯତନ
କେହି କିଛି କହି ପାରେ ନାହିଁ |
ବହୁ ଦୂରୁ ତୋତେ ଦେଖି ଭଲ ଲାଗେ ସତେ
ତୁ ସତେ ଲାଗୁ ନୁହଁଇ କାହାର ,
କିନ୍ତୁ ସଭିଙ୍କୁ ଆପଣାର କରୁ ନିଜ ସେହି ରୂପରେ
କାଶତଣ୍ଡୀ ସତେ ତୁ କେତେ ସୁନ୍ଦର |
ଅନାବନା ଜାଗାରେ ଦେଖି ତୋର ସୁନ୍ଦର କୋମଳ କାନ୍ତି
ଲମ୍ବା ଲମ୍ବା ହୋଇ ଧାଡିରେ ରହି ,
କେତେ କେତେ ମଧୁର ସ୍ବପ୍ନ ତୁ ସଭିଙ୍କୁ ଦେଖାଉ
ତୋର ରୂପ ମନ ନିଏ ମୋହି |
ତୋତେ ଦେଖି ଲାଗେ ସତେ ଆସିବେ ଜଗତ ମାତା
ସେଥିପାଇଁ ତୁ ରହିଛୁ ଫୁଟି ,ଚାହିଁ ,
ତାଙ୍କରି ସ୍ୱାଗତ ହେବ ଏହି ଧରା ପୃଷ୍ଠେ ଏବେ
ହସି ହସି ସଭିଙ୍କୁ ଦେଉଛୁ ଚେତାଇ |
ତାଙ୍କ ପାଇଁ ଲାଗେ ସତେ ବିଛାଇଛୁ ଧବଳ ଚାଦର
ସୂଚନା ଦେଉଛୁ ଶରତ ଋତୁର ଆଗମନର ,
ରାସ୍ତାକଡ ନଦୀକୂଳ ପରି କେତେକେତେ ପରିତ୍ୟକ୍ତ ଜାଗାରେ
ଝୁଲି ଝୁଲି ଖେଳୁ ପବନ ସାଙ୍ଗରେ |
ଏମିତି ଫୁଲ ଅଟୁ ସତେ ସଦା ନଦେଉ ଧରା
ବିରଳ ତୋର ରୂପ ରଙ୍ଗ ପରା ,
ମନ କହେ ତୋତେ ରଖିବି ସାଥେ ଚିରଦିନ ପାଇଁ
ଆହା ,କାଶତଣ୍ଡୀ ତୁ କେତେ ସୁନ୍ଦର ।
