ତୁ ଆ'ରେ ବସନ୍ତ
ତୁ ଆ'ରେ ବସନ୍ତ
ବହୁନି ମଳୟ ଗାଉନି କୋଇଲି
ଆମ୍ରବନେ କୁହୁକୁହୁ
ନିୟମିତ ନୁହେଁ ଖରା ବର୍ଷା ଶୀତ
ପାଣିପାଗ ଜଳବାୟୁ ।
ମାଡି ଆସୁଅଛି ଟାଇଁ ଟାଇଁ ଖରା
ଜାଡ଼ ଶୀତ ନ ଯାଉଣୁ
ଏକ ହାତ ଅନ୍ୟ ଧରାଧରି ହୋଇ
ଆସନ୍ତିନି ଷଡ଼ଋତୁ ।
ଗାଆଁ ଯୁବା ପୁତ୍ର ନବ ବିବାହିତ
ଯାଏ ଦୂର ପେଟ ପୋଷି
ରୋଗ ମହାମାରୀ କାଳର ଆଆଁରେ
ହେଉଛି ଜୀବନ ପେଷି ।
ଫେରୁ ନାହିଁ ପୁଅ ଫେରୁଅଛି ଶବ
କାନ୍ଦୁଛନ୍ତି ମାତାପିତା
ସହୁଛି ଅକାଳ ବୈଧବ୍ୟ ଯନ୍ତ୍ରଣା
ଭୁଆସୁଣୀ ବିବାହିତା ।
ହଜିଛି ଶରତ ହେମନ୍ତ ବସନ୍ତ
ବାତ୍ୟା ପରେ ମହାବାତ୍ୟା
ଝଡ଼ର ଈଗଲ କାଟୁଛି ଚକ୍କର
ମେଲିଦେଇ କ୍ରୁର ପଞ୍ଝା ।
ଖୋଜୁଛି ହୃଦୟ ଆକୁଳ ବିକଳ
ତୁ ଆ'ରେ ବସନ୍ତ ଆ
ସୁରଭିତ ହେଉ ନିଖିଳ ଜୀବନ
ବହିଯା ମଳୟ ବାଆ ।।