ଟୁରୁ ଲଭ୍

ବଡା ଦିନୁ ନୁରୁଥିଲି ଟୁକେଲ୍ ଗୁଟେ

କର୍'ମି ବଲି ସେଟିଙ୍ଗ 

ଦିନ୍ ଗନି ଗନି ରାଏତ୍ ପାହିଯାଏ

କରି କରି ତାର୍ ଉଏଟିଙ୍ଗ।

ପଟ୍'ବାର୍ ତ ଦୁରର୍ କଥା ଆଏ

ସିଙ୍ଗଲ୍ ଦିନ୍ ଯାଉଥିଲା

ଯାହାକେ ମନର୍ କଥା କହୁଥିଲି

ମତେ ମନା କରୁଥିଲା ।

ଚେହେରା ଦେଖି ବାଉନି ଦେଉଥିଲେ

ଟିକେ ଥିଲି ବଲି କଳା

ନିଜ୍'କୁ ନିଜେ ବୁଝେଇ ବୁଝେଇ

 ଦିନ୍ କାଟୁଥିଲି ଏକେଲା ।

ଦିନ୍ କର୍ କଥା ହେଲା ବଡା ଝମେଲା

ଫୁନ୍ ଗୁଟେ ଆଏଲା

ଚିହ୍ନାର୍ ନାଇଁ ଜନାର୍ ନାଇଁ ସେ ଟୁକେଲ୍

ଆ,ଲା,ବୁ ମତେ କହେଲା ।

ଦମ୍'ଧରି ରହିଁ ନାଇଁ ପାର୍'ଲି ଆଉ

ମୁଇଁ ଭି କହେଲି ତାହାକେ

ଉସତ୍ ମନେ ଟିକେ ବଢେଇ କରି

ଆ,ଲା,ବୁ କହେଲି ଘାଏଁକେ ।

ଦେଖୁନ୍,ଦେଖୁନ୍ ଗଲିରେ ବଦିଲି

ଫୁନ୍'ରେ ରହେଲି ବିଜି,

ଦୁଇ ମାସ୍ କଥା ଲାଗ୍'ଲା ଉତାରୁ

ଭେଟ୍'ଘାଟ୍ ହେମୁ ଆଜି ।

ଅଏନ୍ କରି ଟିକେ ସଜେଇ ହେଇଛେ

ପାଉଡର୍,ଅଁତର୍ ଲଗେଇ

ବଡା ସୁନ୍ଦିରୀ ଲାଗ୍'ସି କେତିନି କେତେ

ଡିପି ଥି ଦେଖିଛେ ମୁଇଁ ।

ସମିଆଁର୍ ଆଘୋନୁ ପୁହୁଚିକରି

ତାର୍ ବାଟ୍ ଥିଲି ଟାକିଁ

ସେ ଜାଗାନୁ ବସି,ବସି କରି

ଚାହା ପିଉଥିଲି ଫୁକି ।

 

ଆଏଲା ପାକ୍'କେ ଚିହ୍'ନି ନାଇଁ ପାର୍'ଲି

ଇଟା ବଲି ସେ ଟୁକେଲ୍

ଯାହାର୍ ସାଙ୍ଗେ ଦିନ୍ ରାଏତ୍ କଥା ହେଉଥିଲି

ହାତେ ଧରି ମୁବେଲ୍ ।

ସେ ଦିସୁଥିଲା ପର୍'ରା ଖିର୍ ଖିର୍

ଇ କାହିଁ କଳା ବିଲେଇ

ଫଟୁର୍ କଥାକେ ଭାବି,ଭାବି କରି

ହେଇଗଲି ଗୁନ୍ଦୁଲେଇ ।

ପଚ୍'ରାଲି ତାହାକେ ଯାଏଁ,ଯାଏଁ ଟା

କହିଦେଲା ସବୁ ସତ୍

କିଛି ଉପେୟେ ନାଇଁ ଜୁଟ୍'ଲା ମୁଡେଁ

ହେଲା ବଡା ବିପଦ୍ ।

ନାଇଁ ଦେଖିକରି ଭଲ୍ ପାଇଥିଲି

ତାର୍ ସଜା ପାଏଲି

ପହେଲା କରି ଦିଲ୍ ଦେଇଥିଲି ଯେ

ତାହାକେ ବିହା ହେଲି ।

ସିଙ୍ଗଲ୍ ପଛେ ରହେବ ଭାଇ ମାନେ

ନାଇଁ କର୍'ବ ମୁବେଲ୍ ଲଭ୍

ମୋର୍ ଲେଖେ ନାହେତ ପସ୍ତେଇ ହେବ

ନାଇଁ ଦେଖି କଲେ ଟୁରୁ ଲଭ୍ ।