ଟଙ୍କା

କାଗଜ ଟୁକୁଡା ଭାବନି ମୁଁ ଟଙ୍କା

ସବୁଠାରୁ ବଳଶାଳୀ,

ମଣିଷ ଭିତର ମଣିଷ ପଣିଆ

ସବୁ ଦେଇପାରେ ଗିଳି। [୧]

ସୂରୁଯ କିରଣୁ ଅଧିକା ଝଟକେ

ମହୁ ଠାରୁ ମିଠା ଅତି,

ମୋ ମୂଲେ ମୂଲେଇ ଶସତା ହୁଅଇ

ପୀରତି ସହାନୁଭୂତି। [୨]

ଧନୀ ଗରିବର ଭେଦଭାବ ସିନା

ମୋ ଲାଗି ହୁଅଇ ଗଢା,

କିଏ ସୁଖ ମନେ ଘୋଡା ଚଢେ ଆଉ

କିଏ ହୁଏ ଘର ବୁଡା । [୩]

ଚଉନିଶା ପରି ମୁଁତ ଯାହାପାଇଁ

ହୋଇଯାଏ ଗୋଟେ ନିଶା,

ଅଧରମ ଅସତ ବରବରତା

ତା ମନରେ କରେ ବସା। [୪]

ଭାଇ ଭାଇ କଳି ତକରାଳ ହୋଇ

ଚାଲେ ମାଲି ମକଦ୍ଦମା ,

ପଦବୀ ସମ୍ମାନ କିଣା ବିକା ହୁଏ

ମୁରୁଖ ପଣ୍ଡିତେ ଗଣା । [୫]

ଭଲପାଅ ମତେ ହେଲେ ମୋ ମାୟାରେ

ହୁଅ ନାହିଁ ଜମା ଧନ୍ଦି,

ନୋହିଲେ ଜୀବନେ ବଳି ପଡିଯିବ

ଅରଜିତ ପୂଣ୍ୟ ପୁଂଜି । [୬]

ଅନୁଗତ ଭୃତ୍ୟ କୁଚକ୍ରୀ ମୁନିବ

ଚଂଚଳା ନାମରେ ଡକା,

ବୁଦ୍ଧିମାନର ମୁଁ ସେବା କରିଥାଏ

ମୁରୁଖେ ଦେଖାଏ ନିଚ୍ଚା । [୭]