"ଟଙ୍କା"

କିଏ ଗଢିଲା ଏ ଟଙ୍କାର ଦୁନିଆ

ଗଢିଲା ଲୋଭ ଲାଳସା ।

ଖଣ୍ଡେ କାଗଜରେ ଦେଶଦୁନିଆଟା

କିଣି ଥାଏ ନେଇ ଆଶା ॥

ଟଙ୍କା ସିନା କିଣେ ଘର ବଙ୍ଗଳାକୁ

ଖୁସି ପରିବାର ନୁହେଁ ।

ବିଳାସର ଶେଯ କିଣିଥାଏ ସେଠି,

ସୁଖ ନିଦ୍ରା ହଜିଯାଏ ॥

ନାନା ରକମର ବହି କିଣେ ଟଙ୍କା

ଜ୍ଞାନ ଚତୁରତା କାଢି ।

ଦାମୀ ଦାମୀ ମୂଲ୍ୟ ଘଡ଼ି ସେ କିଣଇ

ସମୟ ମୋଡ଼କୁ ଛାଡ଼ି ॥

ମନଲାଗି ବନ୍ଧୁ କିଣିଥାଏ ବାଛି

ପ୍ରେମକୁ ହରାଇ ଦିଏ ।

ଜନମ ଶିଶୁକୁ କିଣିଥାଏ ସିନା

ଜୀବନଟା ତାର ନୁହେଁ॥

କେତେଦିନ ଆଉ ଚାଲିବ ଏମିତି

ଟଙ୍କାର ରାଜୁତି ନିତି ।

ଲୋଭ, ପ୍ରେମ,ମୋହ ଦୂରେଇ ଆଣିଲେ

ସଂସାର ପାରିବ ଜିତି ॥