ଲାଇବ୍ରେରୀ
ପ୍ରୋଫାଇଲ୍
ଟିକିଟିକି ପିଲାଆମେ
ଟିକିଟିକି ପିଲାଆମେ
1 min
432
ଟିକିଟିକି ପିଲାଆମେ
କାଲି ବଡ ହୋଇବା
ପାଠପଢି ଦେଶଜାତି
ପାଇଁ ସେବା କରିବା ।।୧।।
ଟିକିଟିକି ମହୁମାଛି
ମଧୁ ସଞ୍ଚେ ଫେଣାରେ
ମଧୁଫେଣା ଲାଗିଥାଏ
ମଣିଷର ସେବାରେ ।।୨।।
ଟିକିଟିକି ଫୁଲଫୁଟି
ବୃକ୍ଷ ଦିଶେ ସୁନ୍ଦର
ବାସରେ ତା ମହକାଏ
ଚଉଦିଗ ଆମର ।।୩।।
ଟିକିଟିକି ପିମ୍ପୁଡିଏ
ଖାଦ୍ୟ ବୋହି ଆଣନ୍ତି
ଖରାଦିନେ ସଞ୍ଚିକରି
ବର୍ଷାଦିନେ ଖାଆନ୍ତି ।।୪।।
ଟିକିଟିକି ଉଇ ସିନା
ଗଢେ ସିଏ ବଲ୍ମୀକ
ବିଶାଳ ମନ୍ଦିର ପରି
ଦିଶଇ ତା ଚମକ ।।୫।।
ଟିକିଟିକି ହାତେ ଆମେ
ଦାନ କରୁ ମହତ
ଏଇହାତେ ପୂଣ୍ୟ ଅର୍ଜି
ଯଶ ରଖୁ ଜଗତ ।।୬।।
ଗୋଟି ଗୋଟି ଟଙ୍କା ସଞ୍ଚି
ଶହ ଶହ ହୁଅଇ
ବିପଦେ ଆପଦେ ସଦା
ଦରକାର ଆସଇ ।।୭।।
ଅଳ୍ପ ଅଳ୍ପ ଅଭ୍ୟାସରେ
ବହୁ ପାଠ ପଢିବା
ମଧୁବାବୁ ପରି ଦିନେ
ଆମେ ନାଆଁ ରଖିବା ।।୮।।
