Library
ଟିକିପିଲା
ଟିକିପିଲା
ରହିଛି ପ୍ରମାଣ ଅଙ୍ଗୁଷ୍ଠି ସମାନ
ରୂପେ ନିଜେ ଅବତରି
ବୁଡାଇଲ ସ୍ଥଳ ସାତତାଳ ଜଳ
ଛୁଇଁଲା ଗଗନୁ ଝରି ।
ପୁରାଣରେ ମିଳେ ପ୍ରଳୟ ସଲିଳେ
ଓଷ୍ଠରେ ଅଙ୍ଗୁଷ୍ଠି ଭରି
ବଟପତ୍ରେ ଶୋଇ ସୂକ୍ଷ୍ମତମ ହୋଇ
କି କାରଣେ ଥିଲ ହରି ?
ଆପଦତାରଣ କଲ ଉଦ୍ଧାରଣ
ମାର୍କଣ୍ଡଙ୍କ କର ଧରି
ଋଷି ଧ୍ୟାନେ ବସି ନାଭିଚକ୍ରେ ପଶି
ବିଲୋକିଲେ ପୂର୍ବ ପରି ।
ଭାବରେ ଆହ୍ଲାଦ ଟିକି ପ୍ରହଲ୍ଲାଦ
ଡାକିଲା ବିଶ୍ବାସେ ଚଳି
ସ୍ତମ୍ଭରୁ ବାହାରି ହିରଣ୍ୟକୁ ମାରି
ରଖିଲ ଭକତ ଅଳି ।
ବାମନ ସେକାଳେ ପେଶିଲ ପାତାଳେ
ବିରୋଚନସୁତ ବଳି
ସେ ରୂପ ମହିମା ବର୍ଣ୍ଣିବାର ସୀମା
କିଏ ବା ପାରିବ କଳି ?
ଆପଣଙ୍କ ଶୁଭ ଆଶିଷରେ ଧ୍ରୂବ
ଉତ୍ତାନପାଦଠୁଁ ଗଳି
ଅନ୍ତରୀକ୍ଷେ ସ୍ଥାନ କରିଥିଲ ଦାନ
ତା' ଭକ୍ତି ଭାବରେ ଢଳି ।
ତୁମେ ସେହି ପରା ଟିକିପିଲା ଝରା
ସୁବର୍ଣ୍ଣ ଚାନ୍ଦୁଆ ତଳେ
ରତନ ଖଟୁଲି ଉପରେ ତ ଝୁଲି
କ୍ଷୀର ପିଉଥିଲ ବଳେ ।
ଯଶୋମତୀ କୋଳେ ବଢି ପ୍ରୀତି ଭୋଳେ
ଦୈତ୍ୟଙ୍କ କ୍ରୁରତା ଫଳେ
ଗୋଟିଗୋଟି କରି ଅସୁରଙ୍କୁ ଧରି
ମାରିଥିଲ କଉଶଳେ ।
ମାମୁଁ କଂସରାଟ ଅତୀବ ବିରାଟ
ଯୋଜନା କରିଲା ଖଳେ
ଦେଖି ଟିକିରୂପ ନିମିଷକେ ଭୂପ
ମଞ୍ଚାରୁ ତଳକୁ ଟଳେ ।
ଅନୁନୟ ମତି ବଳାଇବ ପ୍ରତି
ଟିକି ପିଲାଙ୍କର ପାଇଁ
ଘୋର କଳି କାଳେ ବାଲ୍ୟବୋଧ ଆଳେ
କରୁଣା ରଖିବ ସାଇଁ ।
P
