ତଥାପି ବି ଚୁପ୍ ରହିଛି

ସତ କହିବାକୁ ଭାରି ଭଲପାଏ

ତଥାପି ମୁଁ ଚୁପ୍ ରହିଛି;

ଅପ୍ରିୟ ସତ୍ୟଟି ସଂପର୍କକୁ ଭାଂଗେ

ଛଳନାର ଭାର ସହିଛି। [୧]

'ଯେଷା ପାଇଁ ତେଷା',ପ୍ରତିହିଂସା ପଣ

ମନରୁ ମୋ ପୋଛି ଦେଇଛି;

କ୍ଷମା ଦୟା ଆଉ ଆତ୍ମୀୟତା ଭାବ

ହୃଦୟରେ ଭରି ରଖିଛି। [୨]

କପଟ ମିଥ୍ୟା ମାନ ଅପମାନ

ଅନ୍ତରକୁ ଭାରି ବାଧିଛି;

ସରଳ ହୃଦରେ ମୋ ବଡପଣ ରେ

ହସି ହସି କଷ୍ଟ ରୋଧିଛି। [୩]

ଅବିଶ୍ବାସ ବେଡି, କୁସଂସ୍କାର ଶୃଙ୍ଖଳ

ଚଉଦିଗ ଘେରି ରହିଛି,

ନିବୁଜ ଲଣ୍ଠନ ଶିଖାଟି ପରି ମୁଁ

ଦିକି ଦିକି ହୋଇ ଜଳୁଛି । [୪]

ନିଜ ଜୀବନର ସୁଖ ବଳି ଦେଇ

ପରକୁ ଆପଣା କରିଛି,

ମୋହ ମାୟା ଘେରା ଦୁନିଆଁରେ ମୋର

ଅଣ୍ଟି ଛୁରୀ ତଣ୍ଟି କାଟିଛି । [୫]

ଗୋପନରେ କେତେ ସପନ ସଜାଡି

ମନେ ମନେ ଖୁସି ହୋଇଛି,

ସପନ ଶୁଖଠୁ ବାସତବ ଦୁଃଖ

ସବୁବେଳେ ଭାରି ରହୁଛି । [୬]

ସୁଖର ପଛରେ ଧାଇଁ ଧାଇଁ ସଦା

ଧଇଁସଇଁ ସିନା ହେଉଛି,

ସମୟ ନଈରେ ସୁଖର ପଦୁଅଁ

ଘୁଂଚି ଘୁଂଚି ଚାଲି ଯାଉଛି। [୭]

ଅନୁଭୂତି ମୋର ବଡ ଗୁରୁ

ମତେ ଭିନ୍ନ ଅନୁଭବ ଦେଇଛି;

ସେଥିପାଇଁ ମୁଁ ତ 'ତୁଳସୀ ବଣର-

ବାଘ'କୁବି ଚିହ୍ନି ଯାଉଛି। [୮]

କାଉଁରିଆ କାଠି ଭାଙ୍ଗିଯାଏ ସିନା

ନଇଁ ଯାଏ ନାହିଁ କେଉଁଠି"-

ଜୀବନ ଦର୍ଶନ ଆପଣେଇ ଏବେ

ବଂଚିବାକୁ ମନ ବଳୁଛି ।

ତଥାପି ବି ଚୁପ୍ ରହିଛି;

ତଥାପି ବି ଚୁପ୍ ରହିଛି। [୯]