Library
ତ୍ରୁଟି
ତ୍ରୁଟି
ବ୍ୟକ୍ତି ନିତିଦିନ କରୁଥିବା କାର୍ଯ୍ୟେ
କରେ ଯଦି କିଛି ତ୍ରୁଟି
ସେହି ତ୍ରୁଟି ଦିନେ ଅନ୍ୟମାନଙ୍କର
ଘଟାଏ ବିରାଟ କ୍ଷତି ।
ଚିକିତ୍ସକ ଯଦି ରୋଗୀ ଚିକିତ୍ସାରେ
ସାଧାରଣ ତ୍ରୁଟି କରେ
ଧନହାନି ସହ ପ୍ରାଣପୀଡ଼ା ପାଇ
ରୋଗୀଟି ଅକାଳେ ମରେ ।
ପାଚିକାଟି ଯଦି ରନ୍ଧନ କାର୍ଯ୍ୟରେ
ସାମୟିକ କରେ ତ୍ରୁଟି
ଖାଇଲେ ସୁସ୍ଵାଦ ଲାଗେ ନାହିଁ ଖାଦ୍ୟ
ନଷ୍ଟହୁଏ ବ୍ୟଞ୍ଜନଟି ।
ଗାଡ଼ି ଚଲାଇବା ବେଳରେ ଚାଳକ
ତ୍ରୁଟି ଯଦି କରିଥାଏ
ଦୁର୍ଘଟଣା ଘଟି ବହୁ ଲୋକଙ୍କର
ଜୀବନ ହିଁ ଚାଲିଯାଏ ।
ଲାଭ ଆଶା ରଖି ସେତୁ ନିର୍ମାଣରେ
ଯନ୍ତ୍ରୀ ଯଦି ତ୍ରୁଟି କରେ
ସ୍ଵଳ୍ପ ଦିନ ପରେ ସେତୁଟି ଭୁଷୁଡ଼ି
ଯାଏ କେଉଁ ମୂହୁର୍ତ୍ତରେ ।
ବଗିଚାର ଯତ୍ନ ନେବାରେ ହିଁ ତ୍ରୁଟି
କରିଥାଏ ଯଦି ମାଳୀ
ତଦାରଖ ବିନା ମରିଯାଏ ତରୁ
ଅଥବା ପଡ଼େ ଝାଉଁଳି ।
ପାଠ୍ୟପୁସ୍ତକରେ ମୁଦ୍ରଣ ଜନିତ
ତ୍ରୁଟି ଯଦି ରହିଥାଏ
ସେହି ତ୍ରୁଟି ଶିଶୁ ମନେ ଛାପି ହୋଇ
ଚିରଦିନ ରହିଯାଏ ।
ନିଜ ବିଚାରରେ ତ୍ରୁଟି ଯଦି କରେ
ପ୍ରଧାନ ବିଚାରପତି
ନିର୍ଦ୍ଦୋଷ ହିଁ ଦୋଷୀ ହୋଇ ପାଏ ଫାଶୀ
ଦୋଶୀ ପାଇଥାଏ ମୁକ୍ତି ।
ପରିକ୍ଷାର୍ଥୀଙ୍କର ଖାତା ଦେଖିବାରେ
ନିରୀକ୍ଷକ କଲେ ତ୍ରୁଟି
ମନ ବଳ ଭାଙ୍ଗିଯାଏ ସେମାନଙ୍କ
ଭବିଷ୍ୟତ ହୁଏ ମାଟି ।
ତ୍ରୁଟିପୂର୍ଣ୍ଣ ଶିକ୍ଷା ଦେବାଠୁ ଉତ୍ତମ
ବୁଝି ସୁଝି ପଢ଼େଇବା
ଛୋଟ ଛୋଟ ତ୍ରୁଟି ସୁଧାରିଲେ ଆମେ
କ୍ଷତିଠୁ ଦୂରେ ରହିବା ।
