ତୋର୍ ଫାନ୍ଦେ

କଥାକଥାଥିଁ ମହନି ଲଗାସୁ

ହସିଥିଁ ଦେସୁ ଫସେଇ,

ହାଏରେ ମୋର୍ ଭେଜରି-କଁଟା

ଚଲ୍ କର୍'ସୁ ତୁଇ ।

ତୋର୍ ଫାନ୍ଦେ ପଡି ଜେଇଛେଁ ଗା ମୁଇଁ ।

ଠାରି ଠାରି ତୁଇ ମତେ ଡାକସୁ

ଉନହିଁ ଥିଁ ମୁହୁଁ ଲୁକେଇ,

ହାଏରେ ମୋର୍ ଲାଜରି-ଲଟା

କେତେ ଲଜାସୁ ତୁଇ ।

ତୋର୍ ଫାନ୍ଦେ ପଡି ଜେଇଛେଁ ଗା ମୁଇଁ ।

ଟିକେ ଟିକେ ଥିଁ ରିସମି ହେସୁ

ରାଗେଁ ମୁହୁଁ କେ ଫୁଲେଇ,

ହାଏରେ ମୋର୍ ତେତେଲ୍-ଖଟା

ଟର୍'ର୍ କର୍'ସୁ ତୁଇ ।

ତୋର୍ ଫାନ୍ଦେ ପଡି ଜେଇଛେଁ ଗା ମୁଇଁ ।

ଧୁରୁଁ ଦେଖଲେ ବି ବାଆରି ହେସୁ

ଚାଲସୁ ଅଁଟା ମଲକେଇ,

ହାଏରେ ମୋର୍ ଗୁଲାପ୍-ବୁଟା

ଦପ୍ କର୍'ସୁ ତୁଇ ।

ତୋର୍ ଫାନ୍ଦେ ପଡି ଜେଇଛେଁ ଗା ମୁଇଁ ।

ସାଂଗ୍ ଭିଲେ ଥେଇ ଆଏଁଖ୍ ମାର୍'ସୁ

ହଉଥୁସୁ କେତେ ଗେଲ୍'ହେଇ

ହାଏରେ ମୋର୍ ପାନ୍-ଢେଁଟା !

ହାଓ କର୍'ସୁ ତୁଇ

ତୋର୍ ଫାନ୍ଦେ ପଡି ଜେଇଛେଁ ଗା ମୁଇଁ

ଏକଲା ଦେଖ୍'ଲେ ମତେ ଖିଜେଇ ହେସୁ

ଦୁହି ଆଏଁଖ୍ କେ ମିଟ୍'ମିଟେଇ,

ହାଏରେ ମୋର୍ ବହଲ୍-ଅଠା

ଚପ୍ କର୍'ସୁ ତୁଇ ।

ତୋର୍ ଫାନ୍ଦେ ପଡି ଜେଇଛେଁ ଗା ମୁଇଁ ।