Library
Profile
ତୋ ପାଇଁ
ତୋ ପାଇଁ
ମନ ଯମୁନାରେ ତୋ ନାମ ଲହରୀ,
ହୃଦ କୂଳ ଛୁଏଁ କାହ୍ନା
ଭସେଇ ନେଉଛୁ ତୋ ଭାବ ପ୍ରୀତିରେ,
ହୁଏ ମୁହିଁ ଆନମନା ।
ଭୁଲି ଥଳକୂଳ ବନ୍ଧୁ ପରିବାର,
ତୋତେ ମୁଁ ପାଉଛି ଭଲ
ତୋ ନାମ କୀର୍ତ୍ତନ ତୋ ଗୁଣ ଭଜନ,
ତୋ ରୂପ ଦର୍ଶନେ ମନ ।
ଶୟନେ ସ୍ୱପନେ ତୋ ମୁରଲୀ ସ୍ଵନ,
ଅଥୟ କରୁଛି ମୋତେ
ସବୁ ଲାଗେ ପିତା ତୋ ପ୍ରେମଟି ମିଠା,
ଝୁରୁଅଛି ଖାଲି ତୋତେ ।
ଝଲକ ତୋହର ଦେଖାଇ ଦେଉଛୁ,
ଧରା ଦେଉନାହୁଁ କେବେ
ଆସିବ ସୁଦିନ ମାହେନ୍ଦ୍ର ଲଗନ,
କେବେ, ବସି ବସି ମୁହିଁ ଭାବେ ।
ଶ୍ୟାମଘନ ତୋର ଶ୍ୟାମଳ ଶରୀରେ,
ଚନ୍ଦନ ହେବାକୁ ମନ
<p>ଶୀତଳତା ଦେବି ସୁବାସ ଭରିବି,
ଶ୍ରୀଅଙ୍ଗର ଉପବନ ।
ତୁଳସୀ ପତର ହେବାକୁ ମୋ ମନ,
ତୋର ଅଙ୍ଗସଙ୍ଗ ପାଇ
ଦିନ ରାତି ତୋର ପାଶେ ରହିଥିବି,
ଶ୍ରୀମୁଖକୁ ଥିବି ଚାହିଁ ।
ବାସନା ଫୁଲଟି କରିବୁକି ମୋତେ,
ତୋ ପାଦ ସେବା କରିବି
ମାଳାଟିଏ ହୋଇ ଗଳାରେ ଝୁଲିବି,
ତୋ ହୃଦୟ କଥା ଶୁଣିବି ।
ରାଧା ନାମ ଅହରହ ଶୁଣୁଥିବି,
ତୋ ଅନ୍ତର ନିଭୃତ କୋଣୁ
ଜନମ ମୋହର ସାର୍ଥକ ହୁଅନ୍ତା,
ଶୁଣନ୍ତି ମୋହନ ବେଣୁ ।
ଛନ୍ଦାପୟରରେ ଶରଣ ମାଧବ,
ସମର୍ପିତ ଏ ଜୀବନ
ତୋ ମଧୁର ନାମ ତୁଣ୍ଡରେ ମୋହର,
ରହିଥାଉ ଶ୍ୟାମଘନ ।
