ତମେ ଗଲାପରେ
ତମେ ଗଲାପରେ
ସବୁକିଛି ଫିକା ଲାଗେ
ଏକାଏକା ଲାଗେ ସମୟଟା
ଚୁପଚାପ ଦିନଗୁଡା ଭାସିଚାଲିଯାଏ-
ନିଛାଟିଆ ନଦୀର ସୁଅରେ ;
"ତମେ" ଗଲାପରେ ।।
ଦେହ-ମନ ଭାରି ଲାଗେ
ହାଲକା ହାଲକା ଲାଗେ ଜୀବନଟା
ନୀରବରେ ଲୁହଗୁଡା ଗଡ଼ିଚାଲିଯାଏ-
ରଙ୍ଗହୀନ ଗାଲ ଧାରେ ଧାରେ ;
"ତମେ" ଗଲାପରେ ।।
ତମକଥା ମନେପଡେ...
ଧିମାଧିମା ଲାଗେ ନିଃଶ୍ବାସଟା
ଅମାନିଆଁ କୋହସବୁ ଉଠିଚାଲିଯାଏ -
ବୁକୁଚିରି ଶୂନ୍ୟପଥପରେ ;
"ତମେ" ଗଲାପରେ ।।
ନିତି ନିଶି ନିଦେ ଦେଖେ
ଭଙ୍ଗାଭଙ୍ଗା ଲାଗେ ସପନଟା
ଉଡ଼ାଣିଆ ଚଢେଇର ଡେଣା ଜଳିଯାଏ -
ଅସରନ୍ତି ଦୁଃଖର ନିଆଁରେ ;
"ତମେ" ଗଲାପରେ ।।
ମୋ' ଜୀବନ ଦୀପେ ଏବେ
ଦିକ୍ ଦିକ୍ ଜଳେ ସଳିତାଟା
ସୂରୁଜର ଆଭାତଳେ ନିଜେ ହଜିଯାଏ -
ଧୂଆଁଳିଆ ମେଘ ଉହାଡ଼ରେ ;
"ତମେ" ଗଲାପରେ ।।