ତମାଖୁ

ଦୀପ ଜାଳିବାକୁ     ଗରିବ ଥାଳିରୁ 

ଚିପୁଡି ନେଇନି ତେଲ

ଅଗରବତୀ ବି    ଜାଳିଲେ ତୁମେ ତ

ଭଲକୁ କହୁଛ ଭେଲ ।

ବାୟୁମଣ୍ଡଳରେ      ରସାୟନ ବିଷ 

ଦେଇଛି ଯଦି ମୁଁ ଭରି

କହିବ କି ଭାଇ    କେଉଁ ମନ୍ଦିରରେ

କେତେଜଣ ଗଲେ ମରି ?

କେଉଁ ଅବଧିରୁ  କେତେ ଯେ ମଲେଣି

ତମାଖୁ ସେବନ ପାଇଁ

ସେହିକଥା ଟିକେ  ଜଣାଅ କି କେବେ

ଜନସାଧାରଣଙ୍କୁ ଯାଇ ?

ଏଥିପାଇଁ ଅବା     ଧୂମପାନ ଯୋଗୁଁ

ବିବିଧ କର୍କଟ ରୋଗ

ଶ୍ବାସଗତ ଅବା    ଦାନ୍ତ ସମସ୍ୟାରେ

ହେଉନି କି କଷ୍ଟଭୋଗ ?

ପୂରା ପୃଥିବୀରେ   ଆମରି ଦେଶରେ

ସର୍ବାଧିକ ଏହି ବ୍ୟାଧି

ଆପଣା ହସ୍ତରେ    ଜିହ୍ଵା ଛେଦୁଥିଲେ

କିଏ ତା'ର ପ୍ରତିବାଦୀ !

ଯେତେଦିନ ଯାଏଁ    ସମାଜ ଭିତରେ

ପ୍ରଚଳିତ ଥିବ ନିଶା

ତାହାରି ପ୍ରଭାବେ     ଘର ପରିବାର

ହରାଏ ପ୍ରଗତି ଦିଶା ।

ନିଶା ସହ ଯେବେ   ଔଷଧ ସକାଶେ

ବ୍ୟୟ ହେଉଥିବ ଅର୍ଥ

ସୁଦୃଢ଼ ଚରିତ୍ର      ଗଠନ ଦିଗରେ

ଉଦ୍ୟମ ହୋଇବ ବ୍ୟର୍ଥ ।

ତମାଖୁ ବିହୀନ     ଜୀବନ ଯାପନ

ଲାଗେ ସିନା ସ୍ବପ୍ନ ଭଳି

ଆଚରଣ ଦ୍ଵାରା     ଶିଖାଅ ପିଲାଙ୍କୁ

ଭବିଷ୍ୟ ନଯାଉ ଜଳି ।