ତୀକ୍ଷ୍ଣ ସ୍ୱର

ତୁମ କଟାକ୍ଷର ତୀକ୍ଷ୍ଣ ସ୍ୱର ଆଜି ମଧ୍ୟ

ପ୍ରକମ୍ପିତ ହୁଏ ମୋ ହୃଦୟାକାଶରେ 

ମହାଶୂନ୍ୟର ଶୂନ୍ୟବାଣୀ ପରି

ତୁମ ଶବ୍ଦର ଶର ଶଯ୍ୟାରେ ମୋର

ପ୍ରାଣ କ୍ଷତାକ୍ତ ଯନ୍ତ୍ରଣା ଜର୍ଜରିତ

ନବ ପଲ୍ଲଵିତ ସମ୍ଭାବନା ଗୁଡିକ

ଭୂପତିତ ଧରାଶାୟୀ ମୃତବତଃ 

ଆହ୍ଲାଦିତ ହେଉ ନାହିଁ ପ୍ରାଣର ପୁଲକ

ନା ମିଳନର ଅଭୀପ୍ସା ନା ବିଛେଦର ଗ୍ଲାନି

ଛୁଇଁ ପାରୁ ନାହିଁ ବୁକୁ ତଳ ଭୂଇଁ 

ଆତ୍ମଗ୍ଲାନି ଅନ୍ତର୍ଦ୍ୱନ୍ଦ୍ୱର ଘମାଘୋଟ ସଂଗ୍ରାମ 

ଚାଲିଛି ମନ ଓ ହୃଦୟ ଭିତରେ

କିଏ ହେବ ବିଜୟୀ  ଏହା ସନ୍ଦିହାନ 

ସବୁକିଛି ଅସ୍ପଷ୍ଟ  ଚତୁର୍ଦ୍ଦିଗ ଧୂମ୍ରାଭ

ମୃଗତୃଷ୍ଣା ମୋହର ଆଭରଣ ଭିତରେ

ଅଦୃଶ୍ୟ ଭବିଷ୍ୟତର ଦୃଶ୍ୟପଟ