ତଅପୋଇ

ସାଧବ ଘରର ଅଲିଅଳି କନ୍ୟା 

  ଅଟେ ସେ ଭାରି ଗେହ୍ଲେଇ

ସାତ ଭାଇରେ ସେ ଗୋଟିଏ ଭଉଣୀ 

  ନାଆଁ ତା'ର ତଅପୋଇ ।

ଅଭିଶାପ ବଳେ ସେ ସାଧବ ଝିଅ 

  ହୋଇଥିଲା ମର୍ତ୍ତ୍ୟପୁରୀ 

ପୂର୍ବ ଜନ୍ମେ ସିଏ ଥିଲା ଅପସରୀ 

  ପାଇ କେତେ ସୁଖଶିରୀ ।

ବିଧବା ବ୍ରାହ୍ମଣୀ ବିଷ ମିଶାଇଲା 

  ଭାଉଜ ମାନଙ୍କ ମନେ 

ଅବହେଳା କରି ତା' ଭାଉଜ ମାନେ 

   ପଠାଇଲେ ତା'କୁ ବନେ ।

କନିଷ୍ଠ ଭାଉଜ ନିଳେନ୍ଦ୍ରୀଙ୍କ ଠାରୁ 

   ଆଦର ଯତନ ପାଇ 

ସବୁ ଦୁଃଖ କଷ୍ଟ ଭୁଲି ଯାଇଥିଲା 

  ନିରିମାଖି ତଅପୋଇ ।

ଘରମଣି ନାମେ ସୁଧାର ଛେଳିଟା 

   ଦିନେ ବନେ ହଜିଗଲା 

ଏଇ ଛେଳି ପାଇଁ ବଡ଼ ଭାଉଜଟି  

   ଅନ୍ଧାରେ ବନେ ପେଶିଲା ।

ମାଆ ମଙ୍ଗଳାଙ୍କୁ ସୁମରଣା କରି 

  ଛେଳି ସେ ଫେରିପାଇଲା 

ଭାଇଙ୍କ ମଙ୍ଗଳେ ଖୁଦରଂକୁଣିଙ୍କୁ 

   ଖୁଦ ମଣ୍ଡାରେ ପୂଜିଲା ।

ଭାଦ୍ରବ ମାସର ରବିବାର ଦିନ 

  ପଡ଼େ ତଅପୋଇ ଓଷା 

କୁଆଁରୀ କନିଆ ପାଳନ୍ତି ଏହାକୁ 

  ମନେରଖି କେତେ ଆଶା ।