ଲାଇବ୍ରେରୀ
ପ୍ରୋଫାଇଲ୍
ତାକୁ ଭାରି ଭଲପାଇଛି ତେଣୁ
ତାକୁ ଭାରି ଭଲପାଇଛି ତେଣୁ
ସଜ କୁସୁମର ଅନେକ ସକାଳ
ମୋ ଜୀବନ ମୋତେ ଦେଇଛି ଆଣି
ପରଷିଛି ପୁଣି ଶେଫାଳିର ସଞ୍ଜ
କେତେ ଯେ ସେମିତି ମୋ ମନ ଜାଣି ।।
ଝିପି ଝିପି ଝଡ଼ି ବରଷାର ଦିନ
ଆଣିଛି କେତେ ସେ ମୋ ଖୁସି ପାଇଁ
ଭସେଇବି ବୋଲି କାଗଜର ଡଙ୍ଗା
ମୋତେ ସିଏ ପୁଣି କରିଛି ବାଇ ।।
ଦେଇଛି ସେ ମୋତେ ମହୁର ଆନନ୍ଦ
ଚାଖିଛି ତା' ପାଇଁ ଅଲଣା ଲୁଣ
ଜାଣିଛି ତା' ପାଇଁ ରାଗ ବୋଲି ଲଙ୍କା
ବୁଝିଛି କଲରା ପିତାର ଗୁଣ ।।
ପାଇଛି ତା' ପାଇଁ ଗାଆଁର ପରଶ
ସହରରେ ରହି ନେଇଛି ମଜା
ଖାଇଛି କେତେ ମୁଁ ଗାଆଁ ଗଡ଼ିଆର
ମଉରାଳି ମାଛ ବେସର ଭଜା ।।
ଦେଖିଛି ତା' ପାଇଁ ଶୋଭାର ମରତ
ଫଗୁଣ ବି ମୋତେ ଯାଇଛି ଛୁଇଁ
ବୁଲି ଦେଖିବାକୁ ପାଇଛି ସୁଯୋଗ
ବନ ଉପବନ ପାହାଡ଼ ଭୂଇଁ ।।
ବାଟୋଇ କରି ସେ ଜୁଟାଇଛି ବାଟେ
କେତେ ଭଲ ବନ୍ଧୁ କେତେ ଯେ ମିତ
ସୁଖୀ ହେବା ପାଇଁ ବତାଇଛି ସିଏ
କରିବାକୁ ଦୀନଦୁଃଖୀର ହିତ ।।
ସପନ ଦେଖିବା ଶିଖାଇଛି ସିଏ
ମନେ ନାନା ଆଶା ଦେଇଛି ଭରି
ଦେଇଛି ବୁଝାଇ ନିଜକୁ କେମିତି
ଗଢ଼ିବାକୁ ହୁଏ ସୁନ୍ଦର କରି ।।
କାନେ କାନେ ମୋର କହିଛି ସେ ମୋତେ
ଜନମଟି ନୁହେଁ କରମ ବଡ଼
ତା' କଥାରେ ମୋର ଭାଙ୍ଗିଛି ଅଳସ
କାମରେ ଲାଗି ମୁଁ ଜିତିଛି ଗଡ଼ ।।
ଭଲପାଇ ମୋତେ ଦେଇଛି ସେ ବୁଣି
ଅସୁମାରୀ ସୁଖ କିରଣ ରେଣୁ
ଅତି ଆପଣାର ଜୀବନ ସେ ମୋର
ତାକୁ ଭାରି ଭଲପାଇଛି ତେଣୁ ।।
