ସୁପର ପାୱାର
ସୁପର ପାୱାର
ସରିଛି ଦୁଇଟି ବିଶ୍ବ ମହାଯୁଦ୍ଧ
ହେଉଛି ସମରସଜ୍ଜା
ଅବସାନ ଏବେ ତିକ୍ତ ଶୀତଳତା
ଉଷ୍ମ ରଣଭେରୀ ବାଜା ।
ଯୁଦ୍ଧ କୂଟନୀତି ହୁଅଇ ପ୍ରୟୋଗ
ସାମ ଦାନ ଦଣ୍ଡ ଭେଦ
ଦେଖାନ୍ତି ନିଜର ପାରିବାର ପଣ
ପାଶ୍ଚାତ୍ଯ ଦେଶ ଉନ୍ନତ ।
ବିଧ୍ବଂସକ ଅସ୍ତ୍ର କରି ଉଦ୍ଭାବନ
ଖେଳାନ୍ତି ଭୟ ଆତଙ୍କ
ଛୋଟବଡ ଦେଶ ମଣନ୍ତି ନିଜକୁ
ଅସହାୟ ଅସୁରକ୍ଷ ।
ଦୁର୍ବଳ ରାଷ୍ଟ୍ରର ବଢେ ନିର୍ଭରତା
ଉତ୍କଟ ଅତି ସମସ୍ଯା
ଶତ୍ରୁତା କନ୍ଦଳେ ଛନ୍ଦି ହୋଇ ଜାଲେ
ବଢୁଛି ଦୁଃଖ ଦୁର୍ଦ୍ଦଶା ।
ଗଠିତ ହୋଇଛି ବିଶ୍ବ ଜାତିସଂଘ
ନିରାପତ୍ତା ପରିଷଦ
ସଂପ୍ରଭୁତା ପାଇଁ ଭୀଷଣ ସଂଗ୍ରାମ
ଲାଗିରହୁଅଛି ଦ୍ବନ୍ଦ ।
ଦେଖାଏ କ୍ଷମତା ରାଷ୍ଟ୍ର ଆମେରିକା
ସୁପର ପାୱାର ଶକ୍ତି
ୟୁରୋପୀୟ ଦେଶ ମୈତ୍ରୀସଂଘ ମଧ୍ଯେ
ଅଛି ସହମତି ଚୁକ୍ତି ।
ସୋଭିଏତ ଚୀନ ପାଶେ ବି ରହିଛି
ଅମୋଘ ଭିଟୋ କ୍ଷମତା
ଲାଗିଛି ପ୍ରବଳ କ୍ଷମତା କନ୍ଦଳ
ଭୀଷଣ ପ୍ରତିଦ୍ବନ୍ଦିତା ।
ଭାରତ ସମେତ ଗୋଷ୍ଠୀ ନିରପେକ୍ଷ
ବିକାଶଶୀଳ ଭୂଖଣ୍ଡ
ଯୋଗ ଦେବାପାଇଁ ଶରଣେ କାହାର
ହୋଇ ଆସୁଛନ୍ତି ବାଧ୍ଯ ।
ଅଛି ସଂପ୍ରଭୁତା ପ୍ରଚଣ୍ଡ ପ୍ରତିଭା
ପ୍ରଚାର ଶକ୍ତି ସମ୍ବଳ
ପ୍ରଗତି ପଥରେ ଭାରତ ଆମର
ଅଗ୍ରସର ନିରନ୍ତର ।
ନେଉଛି ଭାରତ ବିଶ୍ୱରେ ନେତୃତ୍ବ
ହେଉଛି ଆତ୍ମନିର୍ଭର
ଶାନ୍ତି ଓ ଅହିଂସା ଆଦର୍ଶ ନୀତିରେ
ଅଛି ସୁବିଶ୍ବାସ ତାର ।
କରୁଛି ଭାରତ ପୂର୍ଣ୍ଣ ସହଯୋଗ
ମତ ତା ସୁସ୍ପଷ୍ଟ ସତ୍ଯ
ଭୂମିକା ତାହାର ଅଟେ ଅନିର୍ବାର୍ଯ୍ଯ
ରଖଇ ବଡ ମହତ୍ତ୍ବ ।
ରଚିବ ଭାରତ ସ୍ବର୍ଣିମ ଅଧ୍ଯାୟ
ବିଶ୍ବେ ନୂଆ ଇତିହାସ
ହେବ ବିଶ୍ବଗୁରୁ ମହାନ ଭାରତ
ଅରଜିବ କୀର୍ତ୍ତି ଯଶ ।