ସୁପର ପାୱାର
ସୁପର ପାୱାର
ମୁନିଋଷି ଥରେ ନଦୀଗର୍ଭେ କଲେ
ସୂର୍ଯ୍ୟଙ୍କୁ ଜଳ ପ୍ରଦାନ, ଏତିକିବେଳେ ଯେ ହସ୍ତରେ ତାଙ୍କର
ପଡିଲା କିଛି ତତକ୍ଷଣ ।
ଦେଖିଲେ ମୁନି ଯେ ଆକାଶୁ ଖସିଛି
ଛୋଟ ଏକ ମୂଷାଛୁଆ,
କୂଳକୁ ଆସିଣ ମନ୍ତ୍ର ବଳେ ମୁନି
କଲେ ତାକୁ ଏକ କନ୍ୟା ।
ଅତୀବସୁନ୍ଦରୀ , ବିଶ୍ୱ ମନୋହାରୀ
ତେଜସ୍ୱୀ କନ୍ୟା ସେ କଲେ, ବିଶ୍ୱର ସବୁଠୁ ଶକ୍ତିଶାଳୀ ବର
ବିଭା ଦେବି ବିଚାରିଲେ ।
ତେଣୁ ସେ ସକଳ ଶକ୍ତିର ଆଧାର
ସୂର୍ଯ୍ୟ ପାଶେ ଚଳିଗଲେ, ତୁମେ ହିଁ ପରମଶକ୍ତି ଯେଣୁ, ମୋର କନ୍ୟାକୁ
ଗ୍ରହଣ କର ବୋଇଲେ ।
ସୂର୍ଯ୍ୟ ବୋଇଲେ ଏ ଅତୀବ ସୁନ୍ଦରୀ,
ମୁଁ କିନ୍ତୁ ନୁହେଁ ଶକ୍ତିଶାଳୀ, ଚଲାପଥେ ମୋର ବାଦଲ ଆସିଲେ
ପାରେନାହିଁ ତାକୁ ଟାଳି ।
ତେଣୁ ହେ ବାଦଲ ମୋଠାରୁ ଶକତି,
ଚଳିଯାଅ ତାର ପାଶେ,
ନପାରିବି କରି ଗ୍ରହଣ ଏହାଙ୍କୁ,
ରୁହନାହିଁ ମୋର ଆଶେ ।
ସେଠାବରୁ ମୁନି ସାଥେ କନ୍ୟା ଘେନି
ବାଦଲ ପାଖକୁ ଗଲେ, ଶକ୍ତିଶାଳୀ ଯେଣୁ ସୂର୍ଯ୍ୟଠାରୁ ତୁମେ
ଘେନ ମୋ କନ୍ୟାକୁ ଭଲେ ।
ବାଦଲ ଶୁଣିଣ କହିଲେ ହେ ମୁନି
ମୁଁ କେମିତି ଶକ୍ତିଶାଳୀ ? ମୋହର ସାଥିରେ ପବନ ବହିଲେ
ତାଦିଗରେ ଯାଏ ଚାଲି ।
ତେଣୁ କରି ତୁମେ ମନରେ ବିଚାରି
ପବନ ପାଶକୁ ଯାଅ,
ଅପୂର୍ଵ ସୁନ୍ଦରୀ କନ୍ୟାକୁ ତାସାଥେ
ବିବାହ ପ୍ରସ୍ତାବ ଦିଅ ।
ତଁହୁ ଘେନି କନ୍ୟା ଚଳିଗଲେ ମୁନି
ପବନ ଦେବଙ୍କ ପାଶେ,
କହିଲେ ହେ ଶକ୍ତିଶାଳୀ ! ଘେନ କନ୍ୟା
ଆସିଛି ଅନେକ ଆଶେ ।
ପବନ କହିଲେ ଭୋ ମୁନି ଆପଣ
ଅଟନ୍ତି ତ ଜ୍ଞାନୀଗୁଣୀ, ମୋଠାରୁ ପର୍ବତ କେତେ ଶକ୍ତିଶାଳୀ
ନିଶ୍ଚୟ ଥିବେ ଯେ ଜାଣି ।
ତେଣୁ କନ୍ୟା ଘେନି ଯାଅ ତୁମେ
ଏବେ ପର୍ବତ ଦେବଙ୍କ ପାଶେ, ମୋତେ ଶକ୍ତିଶାଳୀ କହି, ନ ଲଜ୍ଜାଅ
ନ ପକାଅ ଅଟ୍ଟହାସେ ।
ବିରକ୍ତ ହୋଇଣ ମୁନିଗଲେ ତଁହୁ
ପର୍ବତ ଦେବଙ୍କ ପାଶେ, ଶୁଣିଣ ପର୍ବତ ହସିଦେଲେ କହି
ଏକଥା ମନେ ନ ଆସେ ।
ଏତେବଡ ସିନା ବିଶାଳ ଶରୀର
ଚାଲିପାରେନାହିଁ ଜମା,
କେଉଁପରି ତୁମ କନ୍ୟାକୁ ବରିବି,
କରିଦିଅ ମୋତେ କ୍ଷମା ।
ଏହାଶୁଣି ମୁନି ହୋଇଲେ ହତାଶ,
କହୁଅଛନ୍ତି ପର୍ବତ,
ମୋହଠାରୁ ଶକ୍ତି ଅଟେ ଯେ ମୂଷିକ
ଖୋଳିଦିଏ ଦେହେ ଗାତ ।
ଏବେଯାଇ ମୁନି କନ୍ୟାକୁ ଘେନିଣ
ମୂଷିକ ପାଶେ ଚଳିଲେ,
କନ୍ୟାକୁ ବିବାହ କରିବାପାଇଁକି
ନିବେଦନ ତାକୁ କଲେ ।
କନ୍ୟାକୁ ଦେଖିଣ ମୂଷିକରାଜାର
ଲୋଭ ମନେ ଜାତ ହେଲା, ବିବାହ ନିଶ୍ଚିତ କରିବି ହେ ମୁନି,
ସମସ୍ୟା ଗୋଟେ ରହିଲା ।
କନ୍ୟା ତୁମ ଅଟେ ଏତେବଡ ପୁଣି
କ୍ଷୁଦ୍ର ଏ ମୋର ଶରୀର, କେମିତି ରଖିବି ପାଖରେ ମୁଁ ତାଙ୍କୁ
ଛୋଟିଆ ଅଟେ ମୋ ଘର ।
ଏହାଶୁଣି ମୁନି ନିଜ କଳସରୁ
ମନ୍ତ୍ରପାଣି ପକାଇଲେ, ସୁନ୍ଦରୀ କନ୍ୟାକୁ ମୂଷିକ ରୂପରେ
ପରିବର୍ତ୍ତନ କରିଲେ ।
ତହୁଁ ଯେ ମୂଷିକ ବିବାହ କରିଣ
ମୁନିଙ୍କ ଆଶିଷ ନେଲେ, ବରବଧୂ ଏବେ ନିଜ ପୁରେ ଯାଇ
ସୁଖରେ କାଳ କlଟିଲେ ।
ଏପଟେ ଯେ ମୁନି ବିଚାରନ୍ତି ମନେ
ଦଇବ ରଚିଛି ଯାହା, ମୂଷିକ ଭାଗ୍ୟରେ ଶକ୍ତିଶାଳୀ ରୂପେ
ମିଳିଲା ମୂଷିକରାଜା ।
ତେଣୁ ହେ ପାଠକେ ଶକ୍ତିଶାଳୀ ବୋଲି
କେହି ଜଣେ ଏଠି ନାହିଁ, ସମୟ ସାଥିରେ ସର୍ବେ ଶକ୍ତିଶାଳୀ
ଗଢ଼ିଅଛି ଯାହା ବିହି ।
ଗୃହ ମଧ୍ୟେ ଶକ୍ତିଶାଳୀ ଅଟେ ମାଆ,
ସବୁଠାରେ ଅଟେ ଜ୍ଞାନ,
ସମୟ ସାଥିରେ ସୁକର୍ମ କରିବା,
ଲୋକ ହୁଏ ଶକ୍ତିମାନ ।