ସୁନାପିଲା

ମଥାକୁ ସୁନ୍ଦର କେଶ, ଓଠକୁ ସୁନ୍ଦର ହସ,         

ସକାଳୁ ସକାଳୁ ଶେଯ ଛାଡି ଆଗ,               

ଭଲ ଭାବେ ଦାନ୍ତ ଘଷ |   

       

ନଈକୁ ସୁନ୍ଦର ଜଳ, ଗଛକୁ ସୁନ୍ଦର ଫଳ,        

ବାଛି ବାଛି ଖାଅ ସବୁଜ ପରିବା,                 

ଦେହରେ ବଢିବ ବଳ  |    

       

ପାଦକୁ ସୁନ୍ଦର ଜୋତା, ଖରାବରଷାକୁ ଛତା,       

ମନ୍ଦ କଥା କହି ମନରେ କାହାର,               

ଦିଅ ନାହିଁ କେବେ ବ୍ୟଥା |     

     

ମାଛକୁ ସୁନ୍ଦର କାତି, ହାତୀକୁ ସୁନ୍ଦର ଛତି,      

 ପଢ଼ା ବେଳେ ପଢ଼, ଖେଳ ବେଳେ ଖେଳ,         

 ମିଳିମିଶି ସାଙ୍ଗ ସାଥୀ   |     

        

ଅଜାକୁ ସୁନ୍ଦର ବାଡ଼ି, ରାସ୍ତାକୁ ସୁନ୍ଦର ଗାଡି,       

ସତକୁହ ସଦା, ମିଛ କୁହ ନାହିଁ,             

କେବେ କା କଥାରେ ପଡି  |      

     

ବାହାକୁ ସୁନ୍ଦର ବାଜା, ଦେଶକୁ ସୁନ୍ଦର ରାଜା,     

ଗୁରୁ, ଗୁରୁଜନ ଦେବତା ସମାନ,             

କର ତାଙ୍କୁ ଭକ୍ତି ପୂଜା |       

          

ଦିଅଁଙ୍କୁ ସୁନ୍ଦର ରଥ, ରଥକୁ ସୁନ୍ଦର ନେତ,       

ସୁନାପିଲାଟିଏ ହେବ ଯଦି ତୁମେ,             

ମୁଁ ହେବି ତୁମର ମିତ |