ସତ୍ୟ ଯୁଗ ଆସୁଛି

ଆଲୋକ ବର୍ତ୍ତିକା ଭାରତ ବିଶ୍ୱରେ ପ୍ରାଗୈତିହାସିକ କାଳୁ

କରୋନା ଭରିଛି ବିଶ୍ୱରେ ଆତଙ୍କ ଭାରତୀୟ ଆମେ ଭାଳୁ ।

ଗୃହବନ୍ଦୀ ସର୍ବେ ମାସାଧିକ କାଳ ସତେ ଅଣସର ମାନ

ନୂତନ ଲେପରେ ଦାରୁ ଦିଅଁ ଦେବେ ନବ ଯୌବନ ଦର୍ଶନ !

ସଭିଏଁ ସମାନ ପଦବୀ କ୍ଷମତା ହେଲା ଆଜି ମୂଲ୍ୟହୀନ

କାହା ଘରେ ନାହିଁ ବାଇ କର୍ମଚାରୀ ବାହନ ଚାଳକ ମାନ ।

ଯେତେ ଧନ ଥାଉ ସାତ୍ତ୍ଵିକ ଆହାର ସାଥେ ଅଛି ପରିବାର

ପ୍ରଦୂଷଣ ମୁକ୍ତ ରାସ୍ତାଘାଟ ଆମସଫା ଗାଆଁରୁ ସହର ।

କେହି ନୁହେଁ ଆଜି ମଦମତ୍ତ ମନ ମଧ୍ୟେ ଜଡସଡ ଭୟ 

ସର୍ବେ ଏକମୁଖ ହୋଇ ଡାକୁଛନ୍ତି ରଖ ପ୍ରଭୁ ଇଛାମୟ।

ତିରିଶି ଅପ୍ରେଲ ବେଳକୁ ଚାଳିଶ ଦିନ ହୋଇବ ପୁରଣ

ଅଣସର ହୁଏ ପକ୍ଷଟିଏ ତହୁଁ ଅଧିକ ଏ ନିର୍ବାସନ ।

ଆପଣା ଘରକୁ ବୈକୁଣ୍ଠ ସମାନ ନିରନ୍ତର ସ୍ନେହ ଭରି

ସଂସ୍କାର ସଂସ୍କୃତି ପରମ୍ପରା ଆମ ଆସିବ ତହିଁରେ ଫେରି ।

କଳ କାରଖାନା ବ୍ୟବସାୟ ସବୁ ବନ୍ଦରେ ପ୍ରଭାବିତ

ମାରଣ ତାରଣ ବଡ ହେବା ସ୍ୱପ୍ନ କରୁନାହିଁ ଉଚ୍ଚକିତ। 

ଏପରି ମହତ ଜୀବନ ଶୈଳୀକୁ ଆତ୍ମାରେ କଲେ ଗ୍ରହଣ

ସତ୍ୟ ଯୁଗ ଆଉ ବେଶୀ ଦୂର ନୁହେଁ କଳିର ଅପସାରଣ ।

ନମସ୍କାର ପରିଷ୍କାର ସଂସ୍କାର ଯୋଗ ପ୍ରାଣାୟାମ ଭରା

ଭାରତୀୟ ସଂସ୍କୃତିର ଜୟଜୟ ହୁଏ ଆଜି ବିଶ୍ୱ ସାରା ।