ସତ୍ଯ ପଥ ଜଗନ୍ନାଥ ବିଦୁଷୀ

ଅଧର୍ମର ଫଳ ଚିର ଅସନ୍ତୋଷ 

ଅନ୍ୟାୟରେ ନାହିଁ ସୁକ୍ତି,

ଅସତ୍ୟର ମାର୍ଗ ଚିର ଅବଶୋଷ 

ସତ୍ୟ ରେ ମିଳଇ ମୁକ୍ତି ।

ଅନିତ୍ୟ ସଂସାରେ ସବୁ ଲାଗେ ପର

ସତ୍ୟ ଧର୍ମେ ପୁଣ୍ଯେ ଜୟ,

ବିଶ୍ୱାସେ ମିଳଇ ଜଗତ ଠାକୁର 

ଅବିଶ୍ବାସେ ସଦା ଭୟ ।

ପଥ ପ୍ରଦର୍ଶକ ମୋ କଳା ସାଆନ୍ତ

ବତାଇବ ସତ୍ୟ ପଥ,

ଯୁଗେ ଯୁଗେ ପ୍ରଭୁ ସତ୍ୟ ରକ୍ଷା ପାଇଁ 

ଆର୍ଭିଭୂତ ଜଗନ୍ନାଥ।

ସତ୍ୟ ସାରଲ୍ଯ ରେ ଚାଲୁଥିଲେ ପଥ

ମିଳଇ ଦିନେ ଅମୃତ,

ସତ୍ୟ ସନାତନ ଜଗନ୍ନାଥ ନାମ 

ସତ୍ୟ ପଥ ଜଗନ୍ନାଥ ।

ସତ୍ୟପଥ ଅଟେ ଦାରୁଣ ବେଦନା 

ମିଳେ ନିନ୍ଦା ଅପବାଦ,

କୁହ ଜଗନ୍ନାଥ ସତ୍ୟ ପଥ ବିନା 

ପାଏ ତବ ଆଶୀର୍ବାଦ।

ତୁମେ ପରମବ୍ରହ୍ମ ସତ୍ୟ ସନାତନ 

ଦେଖାଅ ବଂଚିବା ରାହା,

ଜୀବନରେ ମୋର ଏହି ଭିକ୍ଷା ପ୍ରଭୁ 

ସାଥୀ ତୁମେ ଚଉବାହା ।

ଚିରସ୍ଥାୟୀ ନୁହେଁ ମାନବ ଜୀବନ 

ସତ୍ୟ ପଥେ ସରିଯିବ,

ମୃତ୍ୟୁର ପୂର୍ବରୁ ଶରଣ ପସିଲେ 

ଜଗନ୍ନାଥ ସାହା ହେବ ।