ସତର୍କ ଚିଠି

କର କପାଳରେ ଲେଖା ତୋ ମରଣ

ଚିତ୍ରଗୁପ୍ତ ପାଞ୍ଜି କରୁଛି ଗଣନ ||1||

ସମୟ ହୋଇଲେ ଯିବାକୁ ପଡିବ

ତା ପୁରୁବୁ ତିନି ଚିଠି ପଠାଇବ ||2||

ପ୍ରଥମ ଚିଠିରେ ଚୁଟି ତୋ ପାଚିବ

ସତରକ ଘଣ୍ଟି ବଜାଇ କହିବ ||3||

ସାବଧାନ ହୁଅ ଛାଡ଼ିମାୟା ମୋହ

ପାଖେଇ ଆସୁଛି ଯିବାର ସମୟ ||4||

ଦ୍ୱିତୀୟ ଚିଠିରେ ଦୃଷ୍ଟି କମିଯିବ

ଆଖି ଥାଇ ସବୁ ଝାପସା ଦିସିବ ||5||

ତୃତୀୟ ଚିଠିରେ ଦାନ୍ତ ହଲିଯିବ

ରସନାକୁ କହେ ଆୟତେ ରଖିବ ||6||

ସୁଆଦିଆ ଖାଦ୍ୟ ଖାଇବା ସମୟ

ଚାଲିଗଲା ଏବେ ବଞ୍ଚିବାକୁ ଖାଅ ||7||

ନଜାଣିଲା ପରି ଅବୁଝା ନହୁଅ

ଫୁଟାଣି ନ ମାରି ସାବଧାନ ହୁଅ ||8||

ସାଇତି ରଖିଛୁ କୋଠାବାଡ଼ି ଘର

ଅମାପ ସମ୍ପତି ହେବନାହିଁ ତୋର ||9||

ଏସବୁର ତୁହି ମାଲିକ ନୁହଁଇ

ସବୁ ରହିଯିବ ତୋସାଥେ ନଯାଇ ||10||

ବିଶ୍ୱଦରବାରେ ମିଛ ତୋ ଆସନ

ଦେଖାଉ ପଦବୀ ଆସନ ଶାସନ ||11||

ଅକରମେ ମାତି ଗରବ ଦେଖାଉ

ରାମକୃଷ୍ଣ ନାମ ସବୁ ଭୁଲିଯାଉ ||12||

ସବୁ ଜାଣି ଶୁଣି ହେଉତୁ ଅଜଣା

ସଂସାର ମାୟାରେ ହେଉ ବାଟବଣା ||13||

ସମୟାନୁକ୍ରମେ ସତରକ କଲା

ସଜାଗ ହେବାକୁ ଇସାରା ସେ ଦେଲା ||14||

ଧରମ କରମ କରିଥିବୁ ଯେତେ

ସ୍ମୃତିରେ ରହିବ ଏ ସାରା ଜଗତେ ||15||

ହରି ପାଦ ପଦ୍ମେ ଲଗାରେ ତୋ ମନ

ପାଖେଇ ଆସିଲା ଛାଡ଼ିବୁ ଭୁବନ ||16||