ଶୀତ

ଗ୍ରୀବଶହେ ଶିବ     ଷଡ ଋତୁ ଆଦ୍ୟ

      ଅକ୍ଷରୁ ଆରମ୍ଭ ହୁଏ 

ସେ ମଧ୍ୟରୁ ତିନି     ଖରା ବର୍ଷା ଶୀତ 

     ଅନୁମେୟ ହୋଇଥାଏ ॥

ଶରତ ପ୍ରବେଶେ      ଦଶରାଠୁ ଶୀତ

      ପସରା ତାର ମେଲାଏ

ମାଘ ପୂର୍ଣ୍ଣିମାରେ     ଅଘି ଜାଳି ଦେଲେ

      ଶୀତଟଳି ଯାଇଥାଏ ॥

କାକର କୁହୁଡି        କୋହଲା ପବନ 

       ଶୀତର ଆୟୁଧ ଇଏ

ଗରିବ ଗୁରୁବା       ବୃଦ୍ଧଜନ ପାଇଁ 

       ଅନେକ କଷଣ ଦିଏ ॥

ବାଳକ ଯୁବକ        କୃଷକ ସୈନିକ

     ଖେଳାଳି ଯୋଗୀ ବୈରାଗୀ

ଶୀତକୁ ଖାତିରି       କରନ୍ତିନି କେବେ

      କରମରେ ସହଭାଗୀ ॥

ଏ ଋତୁରେ ଲକ୍ଷ୍ମୀ        ଓହ୍ଲାଇ ଆସନ୍ତି

       ଅନ୍ନର ଭଣ୍ଡାର ଧରି

ବରଷକ ଖାଦ୍ୟ         ଅମଳେ ରଖନ୍ତି

       କୃଷକ ଗୃହରେ ଭରି॥

କେତେ ଫୁଲ ଫଳ     କେତେ ଓଷାବ୍ରତ

      ଶୀତରେ ଆସଇ ଧରା

ହରସ ଭରନ୍ତି       ପ୍ରେମ ମୈତ୍ରୀ ବାଣ୍ଟି

       ସୃଷ୍ଟି କରି ଭାଇଚାରା ॥

ନୂତନ ବରଷ          ଆରମ୍ଭ ହୁଅଇ

      ଏ ଶୀତ ଋତୁ କାଳରେ

ଖରା ବର୍ଷା ଶୀତ       ସହିବାକୁ ବଳ

       -ଆଶିଷ ଦିଅ ଠାକୁରେ ।