ସ୍ଥିତି ବିଗୁଡୁଛି
ସ୍ଥିତି ବିଗୁଡୁଛି
କଟକଣା ଗତି ମନ୍ଥର ବେଗରେ
କୋରନାର ବାଟ ଖୋଲା ।
ପାଟି ବୁଡି ପାଣି ନାକ ଛୁଇଁଲାଣି
ତଥାପି ଜନତା ଢିଲା ।।
ନିବାରକ ନୀତି ବିଳମ୍ବେ ପ୍ରୟୋଗ
ଅଣାୟତ କରେ ସ୍ଥିତି ।
କୋରନା ଆତଙ୍କ ଅତି ଭୟଙ୍କର
ସଂକ୍ରମଣ ସାଙ୍ଘାତିକି ।।
ଅମାନିଆ ଆମ ଜନ ସାଧାରଣ
ନୀତି ନିୟମକୁ ଦେଖି ।
କୋରନା ବଢୁଛି ଆଗକୁ ଆଗକୁ
ନିର୍ଭୟେ ଫୁଲେଇ ଛାତି ।।
ସର୍ବେ ବେଫିକର ନାହିଁ ଭୟ ଡର
ବେପାରୁଆ ବିଚରଣ ।
କୋରନାର ପଥ ପରିଷ୍କାର ହୋଇ
ବୃଦ୍ଧି ହୁଏ ସଂକ୍ରମଣ ।।
ଦୂରତା ରଖିବା ଦୁରୁହ ବ୍ୟପାର
ଅଯଥା ଗହଳି ବେଶି ।
ମୁଖେ ମୁଖା ନାହିଁ ହାତକୁ ନ ଧୋଇ
ସମସ୍ତେ ଯାଆନ୍ତି ଫସି ।।
ନେତା କରୁଛନ୍ତି ନିର୍ବାଚନ ରାଲି
ଜନତାଙ୍କୁ କରି ଢାଲ ।
ରାଲିକୁ କୁଆଡେ କୋରନା ଛୁଏଁନା
ନେତାଙ୍କୁ ପାଏ କି ଭଲ ??
କୁମ୍ଭମେଳା ଭଳି ଧାର୍ମିକ ଭିଡରେ
ଆଦମ କାଇଦା ନାହିଁ ।
ସଂକ୍ରମଣ ସେଠି ବିସ୍ଫୋରଣ ହୁଏ
ପ୍ରଶାସନ ଯାଏ ଶୋଇ ।।
ସ୍କୁଲ କଲେଜର ପରୀକ୍ଷା ବାତିଲ
ଭବିଷ୍ୟତ ଯାଏ ଚୁଲିକି ।
କ୍ଷମତା ଲୋଭରେ ନେତାଙ୍କ ଗହଳି
ଜନତାଙ୍କ ସଙ୍ଗେ ଚାଲିକି ।।
ନେତା ଜନତାଙ୍କ ଅବାଧ ମିଳନ
ଭକ୍ତ ସଙ୍ଗେ ଭଗବାନ ।
ସରକାରଙ୍କର କୋଭିଡ଼ି ନିୟମ
ହେଉନି କି ଉଲଂଘନ ??
ଉଚିତ ବେଳରେ ଢିଲା ପଦକ୍ଷେପ
କୋରନାକୁ ସୁହାଉଛି ।
ବନ୍ଧ ବାଡ଼ ଭାଙ୍ଗେ କୋରନା ତରଙ୍ଗ
ପରିସ୍ଥିତି ବିଗୁଡୁଛି ।।
ଅବସ୍ଥାକୁ ଦେଖି ବ୍ୟବସ୍ଥାରେ ବ୍ୟସ୍ତ
କେନ୍ଦ୍ର ରାଜ୍ୟ ସରକାର ।
ଜନ ସାଧାରଣ ସହଯୋଗ କଲେ
ମହାମାରୀ ହେବ ଦୂର ।।
ତାଲାବନ୍ଦୀ କରି କର୍ଫ୍ୟୁ ଜାରୀ ସହ
ଲୋଡ଼ା ଜନ ସଚେତନ ।
ସମଗ୍ର ଦେଶରେ ଟୀକାକରଣକୁ
କଲେ ସର୍ବେ ସମର୍ଥନ ।
କୋରନା ଯୁଦ୍ଧରେ ଜିତିବା ସମସ୍ତେ
ଖୁସିରେ କାଟିବା ଦିନ ।।