ସତେ କଅଣ ସବୁ ଇଚ୍ଛା ପାର୍ବଣହୁଏନି

ରାତି ପାହିଥାଏ, ସକାଳ ହୁଏ, ସିନ୍ଦୁରା 

ଫିଟିଲେ ପୂର୍ବ ଆକାଶରେ

ମନ ନାଚି ଯାଏ ଚଢେଇ ମାନଙ୍କ 

କିଚି ମିଚି ଶବ୍ଦର ତରଙ୍ଗରେ ।

କିଛି ଶାନ୍ତି ପରେ ମନ ମଧ୍ୟରେ ଆସେ, 

ଜୀବନ ଯୁଦ୍ଧରେ ଯୁଝିବାକୁ ତ ହେବ

ସମୟ ଗଡୁଛି, ବାଜିଲାଣି ଘଣ୍ଟା, ସଜବାଜ 

ହୋଇ କାର୍ଯ୍ୟକୁ ଯିବାକୁ ପଡିବ ।

ଚଷା ପୁଅ ହଳ ଯୋଚି ବାହାରି ଯାଏ ଚାଷ

କରିବାକୁ ନିଜ ଧାନ ବିଲରେ

ଦୀନ ମଜୁରିଆ ଓ ମଧ୍ୟବିତ୍ତ ଦଉଡନ୍ତି ଖାଦ୍ୟ 

ପାଇଁ ତେଲ ଲୁଣ ଶାଗ ସାଉଁଟିବାରେ ।

ମନୁଷ୍ୟ ଖୋଜୁଛି, ମଣିଷ ପାଖରୁ, ସ୍ନେହ 

ଓ ପ୍ରେମର ପଥ କେମିତି ପାଇବ

ଦୀନ ହୀନ ମଣିଷ ହାତ ପାତେ, ଇଶ୍ୱର 

ଦୁଆରେ କିପରି ଦୁଃଖ ଯାତନା ମିଟାଇବ  ।

ମନୁଷ୍ୟ ଭିତରେ, ମଣିଷ ଖୋଜୁଛି, 

ମାନବତ୍ୱର ସଠିକତାର ଠିକଣା

ଜନତାର ଲୁହ ପଚାରେ ଆଜିର ନେତାର 

ଲୁହକୁ, ଏ ଲୁହ, ସତ ଅବା ମିଛ ଛଳନା ।

ମନ୍ଦିରରୁ ଓଁକାର ଧ୍ବନି ଓ ଆକାଶ ବାଣୀର 

ଭକ୍ତି ସଙ୍ଗୀତ ଭାସି ଆସେ ପ୍ରତିଦିନ 

ପ୍ରାପ୍ତି, ଅପ୍ରାପ୍ତିର ଅବଶୋଷ ନାହିଁ, ଆଶା ଅବା 

ପ୍ରତ୍ୟାଶା ନାହିଁ ଜୀବନର ଗତି ସର୍ତ୍ତ ହୀନ ।

ପ୍ରତାରଣାର ମିଛ ପ୍ରତିଶ୍ରୁତିରେ ଗରିବ 

ଗୁରୁବା ଯେତେ ହେଉଛନ୍ତି ହନ୍ତସନ୍ତ

ସପନ ସାଜିଛି ଶ୍ରମଜୀବିର ଲୋଡା ନାହିଁ 

ଧନ, କିପରି ପାଇବ ସେ ମୁଠେ ଭାତ  ।

ମନରେ ଆସୁଛି, ହୃଦୟ ନିର୍ମଳ ପରି ଗଙ୍ଗା

ଜଳ ପରି ମଣିଷ ଯଦି ହେବ

ମମତା କମଳ ହୃଦୟେ ଉଠିବ ଫୁଟି ସଂସାର

ଭିତରେ ସତ୍ୟ ବିରାଜିବ ।

ସତେ କଅଣ ସବୁ ଇଚ୍ଛା କେବେ ପାର୍ବଣ ହୁଏନି, 

ପୁଣି ଆସେ ମନ ଭିତରେ, 

ବର୍ତ୍ତମାନ ଅବସ୍ଥାକୁ ଦେଖି ଲେଖୁଛି ପରା ଯନ୍ତ୍ରଣା 

ଜର୍ଜରିତ ହୃଦୟରେ ।