🪴ଷୋଳକଳା ପୂର୍ଣ୍ଣ ତୁମେ ଚକାଡୋଳା

ହେ ଜଗତ ନାଥ ତୁମେ ସ୍ଵୟଂ ପରଂବ୍ରହ୍ମ

ଅନାଦି ଅବ୍ୟକ୍ତ ରୂପ   ଅନନ୍ତ ଅସୀମ

      ଷୋଳ କଳା ବିଭୂଷିତ 

ନୀଳାଚଳେ ଦାରୁ ବ୍ରହ୍ମେ ତୁମେ ଜଗନ୍ନାଥ ,!

ସାଂସାରିକତାରୁ ମୁକ୍ତି ସଂସାରରେ ରହି 

ପ୍ରଥମ କଳା 'ନିବୃତି' ନାମକୁ ଯେ ବହି 

     ନାମ ଦ୍ୱିତୀୟେ ପ୍ରତିଷ୍ଠା 

ସତ୍ ମାର୍ଗେ ପାଏ ଯଶ ଯେ ପାଳଇ ନିଷ୍ଠା ,!

ଥାଏ ନିଃସ୍ୱାର୍ଥପରତା ଜନହିତେ ବାର୍ତ୍ତା 

ତୃତୀୟ କଳାରେ ବିଦ୍ୟା ନାମରେ ଭୂଷିତା

     ଶାନ୍ତି ଚତୁର୍ଥ ନାମଟି 

ମନ ଓ ମସ୍ତିସ୍କ ମଧ୍ୟେ ସମନ୍ଵୟ ସୃଷ୍ଟି ,!

ଅନ୍ତର୍ନିହିତ ଶକତି    ସଂଗ୍ରହର କଳା 

ପଞ୍ଚମେ ନାମ ଇନ୍ଦିକା ଘେନ ଚକାଡୋଳା 

     ଶକ୍ତି ସତ୍ୟର ଭଣ୍ଡାର 

ଦୀପିକା ନାମରେ ଷଷ୍ଠେ ଶୋହେ ନିରନ୍ତର ,!

ନିଜ ଦେହ ରାକ୍ଷସକୁ ନିଜେ ନିଜେ ଚିହ୍ନ 

ପରିତ୍ୟାଗ କରି ତାକୁ।  ହୁଅ ସୁଧି ଜନ

     ନାମ ସପ୍ତମେ ରେଚିକା 

ଜୀବନର ସୁପଥକୁ ସୁଚାଏ ଯେ ଏକା,!

ମାୟା ମୋହ ସଂସାରରୁ ମୁକ୍ତି ହେବା କଳା 

ଅଷ୍ଟମେ ନାମ ମୋଚିକା ଘେନ ନନ୍ଦ ବଳା 

     ପରା ନବମର ନାମ

ନୂଆ ଦିଗ ନୂଆ ଲକ୍ଷ ସ୍ଥାପନାରେ ଧର୍ମ ,!

ସୂକ୍ଷ୍ମରେ ସୂକ୍ଷ୍ମରେ ସବୁ  ଅଡ଼ୁଆର ପଥ

ଦଶମେ ସୁପଥ ଦିଏ ସୂକ୍ଷ୍ମ ନାମେ ସେତ

     କଥା ଅମୃତର ତୁଲ୍ୟ

ସୂକ୍ଷ୍ମ ଅମୃତ ନାମରେ ଏକାଦଶେ ମୂଲ୍ୟ ,!

ଭଲ ମନ୍ଦ ବୁଝିବାରେ   ପ୍ରଭେଦଟି ଜ୍ଞାନ

ଷୋଳ କଳା ମଧ୍ୟେ ପାଏ ଦ୍ଵାଦଶରେ ସ୍ଥାନ 

     ତ୍ରୟୋଦଶେ ଜ୍ଞାନାମୃତ

ଲଭେ ସର୍ବ ଜ୍ଞାନ ବାଣ୍ଟେ ସମାନ ଅମୃତ ,!

ନିଜେ କଷ୍ଟ ସହି ସହି   ସମାଜ କଲ୍ୟାଣ

ଚତୁର୍ଦ୍ଦଶ କଳା ଏହି   ଆପ୍ୟାୟିନୀ ନାମ

      ପଞ୍ଚ ଦଶରେ ବ୍ୟାପିନୀ

ସତ୍ୟର ସ୍ଥାପନା ଅର୍ଥେ ଅବତାର ଘେନି ,!

ବିରାଟ ବ୍ୟକ୍ତିତ୍ୱେ ସର୍ବେ କରି ସମାହିତ 

ବ୍ୟୋମରୂପା ଷୋଡଦଶ ସ୍ଥାନେ ଅବସ୍ଥିତ 

      ଷୋଳ କଳାର ବର୍ଣ୍ଣନ 

ହୋଇଲା ସମ୍ପୂର୍ଣ ଦୟା ରଖ ସୁଦର୍ଶନ ,!