ସରିତ ସୁଅରେ

 

ଅହଂକାର ତ ଏବେଠୁ ଆମକୁ 

ମାଡ଼ି ବସିଲାଣି 

ଏଇଟି କ'ଣ ପ୍ରସ୍ତୁତି ପର୍ବ ?

ମୁଁ ତ ଏତିକି ଜାଣେ ,

ସ୍ୱପ୍ନସବୁ ସତ ହେବାର 

ଯେଉଁ ଲକ୍ଷଣମାନ ଦେଖିପାରୁଛି 

ସେସବୁ କେବଳ ଭ୍ରାନ୍ତ ଧାରଣା ମୋର । 

ସତ ତ ଏଇଆ ,

ତୁମ ଅପେକ୍ଷାରେ ଜଗି ବସିଛି ମୁଁ 

କାହିଁ କେଉଁ କାଳରୁ 

ଆଜି ତୁମେ ଏତେ ପାଖରେ 

ତଥାପି ଲାଗ ଅପହଞ୍ଚ ଭଳି । 

କାଲି ନିଶ୍ଚୟ ଆସିବ , 

ତୁମକୁ ଆସିବାକୁ ହେବ 

ଏଇଟି ଆକାଂକ୍ଷା କି ବିଶ୍ୱାସ ?

ରାତି ପାହିଲା ପରେ 

କାଲିର ସୂର୍ଯ୍ୟୋଦୟ ପୂର୍ବରୁ 

ସବୁ ପରିଷ୍କାର ହୋଇଯିବ । 

ତୁମେ ଏବେ ଶୋଇଯାଇଥିବ 

ମୋତେ ବି ଶୋଇଯିବାକୁ ହେବ କାଲିପାଇଁ

ନୂଆ କିଛି ଫୁଟିବାର ବାସିବାର ସ୍ୱପ୍ନନେଇ

ଆଉ ତୁମ ସ୍ପର୍ଶର ଅଭୀକ ଅଭିପ୍ସା ମନାସି । 

ଚାଲିଆସ , ପଶିଆସ 

ପଡ଼ି ରହିଥିବା‌ ସବୁ ଅଫୁଟା 

କଢ଼କୁ ଫୁଟାଇଦେଇ ଯାଅ  

ଆଉ ଭସାଇ ନିଅ ସାଥିରେ

ମୋର ସବୁ ଅପାରଗତାକୁ 

ସେହି ସରହସ୍ଯ ସରିତ ସୁଅରେ ।