ନୂଆ ବର୍ଷପାଇଁ ମୋ କବିତା

ତୁମେ ଆସିବ ବୋଲି 

ଆମ ବାଡ଼ି ଆମ୍ବ ତୋଟା ମାଳେ 

କୁମ୍ଭାଟୁଆ ତୋଳୁଛି ମହ୍ଲାର 

 ଅହ ରହ ରଟୁଛି ସେ 

 ତୁମ ଆଗମନର ମଧୁର ରାଗିଣୀ !

ମାଘର ବାଘୁଆ ଶୀତ 

ବାଧକ ପାରିନି ସାଜି 

ଅଟକାଇ ପାରିନି ସେ 

ଉତ୍ସାହ ଉଦ୍ଦୀପନାର 

ଖୁସିର ଜୁଆର !

ଦୀପ ବାଣ ରୋଷଣୀ ଝାଡ଼ରେ 

ସୁସଜ୍ଜିତ ଆଲୋକ ମାଳରେ 

 ଦୁନିଆ ସାଜିଛି ଆଜି 

 ଅନୂଢ଼ା ଅଭିସାରିକା 

 ଚିକମିକ ରଙ୍ଗ ବେରଙ୍ଗ 

 ଗୋଲାପୀ ଓଢଣୀ ରେ !

 ତୁମେ ଆସିବ

 ପ୍ରିୟତମ ସାଜି 

 କେତେ ସୁନେଲି ସ୍ବପ୍ନ 

 ଆଶା କଳ୍ପନା ବିଶ୍ୱାସକୁ 

 ଉପହାର ମାଳା ଗୁନ୍ଥି 

 ଢାଳି ଦେବ ମୋ ପଣତରେ 

 ଭରିଦେବ ହସର ଜୁଆର, 

 ହରା ଭରା ଚୁନା ଚୁନା 

 ଖୁସିର ଫସଲ !

ମୋ ଅଗଣାରେ 

 ମାଳତୀ କୁଞ୍ଜରେ 

 ପେଂଥି ପେଂଥି ଫୁଲ ର ବଳୟ 

 ତୁମରି ସ୍ୱାଗତ ପାଇଁ 

 ଖିଲି ଖିଲି ହାସେ ଗେଣ୍ଡୁ 

 ଗୁନ୍ଥିଛି ଗଜରା, 

 ସାରାରାତି ଉଜାଗରେ 

 କେତେ ଉଦ୍ଦୀପନା ଭରେ, 

 ଭିଜା ଭିଜା ମନ ତଳେ 

 ସୀମାହୀନ ଆଶା 

 ଅସୁମାରୀ କଳ୍ପନାର ସୁଅ, 

 ତୁମେ ଆସିବ, ବଦଳିବ ସବୁ 

 ଢାଳି ଦେବ ନୂତନ କିରଣ 

 ହସାଇବାକୁ ଏ ସାରା ଜଗତ

 ସାଙ୍ଗେ ନେଇ ଋତୁ ରାଣୀ 

 ଶ୍ରାବଣ ସାଥେ ନହୁଲୀ ଫଗୁଣ ।