ଶୂନ ରାତିର ତାତି
ଶୂନ ରାତିର ତାତି
ଏମିତି ଜାବୁଡ଼ି ଧରନ୍ତ କି ମତେ
ଦେହ ମୋ ଯାଆନ୍ତା ଥରି
କସ୍ତୁରୀ ସରି ମୋ ଦେହ ବାସନ୍ତା
ତୁମ ଦେହ ବାସ୍ନା ପରି ।
ଏମିତି ମୁକୁଳା ରଖନ୍ତି କି କେଶ
ଅନ୍ଧାରେ ଲୁଚନ୍ତି ଥରେ
ଆକାଶରେ ତାରା ଯେମିତି ଦିଶନ୍ତି
ପୂର୍ଣ୍ଣ ଗ୍ରାସ ପରାଗରେ ।
ଏମିତି ଓଠକୁ କାମୁଡି ଦିଅନ୍ତ
ସେ ରଙ୍ଗ ଯାଆନ୍ତା ଲାଖି
ଓଠ ତୁମ ଦେଖି ଆଇନା ହସନ୍ତା
ଲାଜରେ ବୁଜନ୍ତ ଆଖି ।
ତର୍ଜନି ନଖରେ ଗାରେଇ ପକାନ୍ତ
ଛାତିରେ କାଗଜ ଭାବି
ଜଙ୍ଗଲର ରାଜା ଚମକି ଉଠନ୍ତେ
ପକ୍ଷୀଏ ଦିଅନ୍ତେ ରାବି ।
ଏମିତି ପାଦରେ ଛନ୍ଦି ଦିଅନ୍ତ କି
ଉଷ୍ଣପ୍ରସବଣ ତାତି
ଲୋମକୂପ ସବୁ ଶିହରୀ ଉଠନ୍ତେ
ପ୍ରଣୟେ ଯାଆନ୍ତେ ମାତି ।
ଏମିତି ସପନ ଦେଖନ୍ତୁ ପ୍ରେମୀଏ
ଆସନ୍ନ ଏ ଶୂନ ରାତି
ନୂଆ ବରଷରେ ଏତିକି କାମନା
ମିଳନ୍ତୁ ଖୋଜିଲା ସାଥୀ ।