ଫେରିଆସନ୍ତ କି ଥରେ

ଫେରି ଆସନ୍ତ କି ଜହ୍ନ ଜୋଛନାରେ

ମନ ଅଗଣାକୁ ଥରେ,

ଭିଜେଇ ଦିଅନ୍ତ ସୁଶୀତଳ ଧାରେ

ପ୍ରେମାସିକ୍ତ ପୁଲକରେ ।

ସ୍ମୃତି ତବ ହାତ ଠାରେ,

ସତେକି ଚାତକ ଭିଜିବ ପ୍ରାଙ୍ଗଣେ

ଆଶା କେତେ ଉଙ୍କି ମାରେ ।।

ଫେରି ଆସନ୍ତ କି ପାହାନ୍ତି ସପନେ

ସାଜି ମୋ ସପନ ରାଣୀ,

ସତ ନ ହେଲେ ବି ସପନରେ ଥରେ

ପାଶେ ନିଅ ତୁମ ଟାଣି ।

ପ୍ରିୟତମା ମୋର ଜେମା,

ସାଜିବି ସପନ ସୌଦାଗର ତୁମ 

ଖୁସିର ନଥିବ ସୀମା ।।

ଫେରି ଆସନ୍ତକି ବରଷା ସାଥିରେ 

ସାଜି ତୁମେ ସୌଦାମିନୀ,

ତୁମ ଚମକରେ ଅମା ଅନ୍ଧକାରେ

ଜଳନ୍ତା ପ୍ରେମର ବହ୍ନି ।

ଆଜିବି ମୁଁ ପ୍ରତୀକ୍ଷାରେ,

ତବ ପରଶ ପାଇଁ ରହିଛି ଚାହିଁ

ଫେରି ଆସନ୍ତ କି ଥରେ ।।

ଫେରି ଆସନ୍ତ କି ଗୋଧୂଳି ଲଗନେ

ହୃଦ ଉପବନେ ମୋର,

ମହକରେ ତୁମ ଶିହରି ଉଠନ୍ତା

ଛାତି ତଳ କାରାଗାର ।

ଆଗୋ ଅଭିମାନୀ ମୋର,

ବିରହ ଫଗୁଣ ନିକ୍ଷେପ କରିଣ

ଫେରି ଆସ ଏଇ ଥର ।।