ପ୍ରେମରେ ପ୍ରେମରେ

"ପୁଷ୍ପିତ ଅଧର ସର୍ପିଳ ଶରୀର

    ଭରା ଯୌବନର ନଈ,

ପ୍ରଣୟ ପିୟୁଷେ ଅମୃତ ଲଭଇ

    ପ୍ରୀତି ଝରଣାରେ ମୁହିଁ 

    କୃଷ୍ଣଚୁଡା ତୁମ ପାଇଁ,

ଇନ୍ଦ୍ରଧନୁର ସେ' ସପ୍ତରଙ୍ଗେ ଆଜି

    ରଙ୍ଗାୟୀତ ତୁମ ପାଇଁ l

ରୂପାନ୍ତର ଆଜି ହୋଇଛି ମୋ' ଦେହେ  

    କାଚରୁ କାଞ୍ଚନ ଯାଏ,

ତୁମ ମୃଦୁ ସ୍ପର୍ଶ ପ୍ରାପ୍ତ ହେବା ଦିନୁ

   ପ୍ରେମରେ ହଜିଲି ହାଏ

   ପ୍ରୀତିରେ ଭିଜିଲା ପ୍ରାୟେ,

ବିଶାଳ ହୃଦୟେ ତୁମକୁ ପାଇଛି

   କୃଷ୍ଣଚୁଡା ମୋର ପ୍ରିୟେ l

ଜୀବନ ଯନ୍ତ୍ରଣା ଯୌବନ ଯାତନା

    ନାଶ ଗଲା ତୁମ ପାଇଁ,

ବୟସର ମଖ-ମଲି ଚଟାଣରେ 

    ପାଦ ଛାପିଅଛ ଯାଇଁ

    ଭୀତ ପ୍ରାୟ କିସ ପାଇଁ,

ଆଗମିବ ସତେ ପ୍ରେମ ଦରବାରେ 

    ପ୍ରଣୟ ସାଥିରେ ନେଇ l

ସପନ ସୁନ୍ଦରୀ ମୋ' ମନ ମାନସୀ

    ବୟସର ରଙ୍ଗ ବୋଳି,

ଆସ ଗୋ' ମାନିନୀ କିମ୍ପା ଅଭିମାନ

    ବାହୁରେ ଧରନ୍ତି ତୋଳି

   ପ୍ରୀତିରେ ଖେଳନ୍ତେ ଦୋଳି,

ଅମାନିଆ ମନ ବୁଝିଯା'ନ୍ତା ସତେ 

    ସାଜି ତୁମ ଗଳା ମାଳି l