ବଉଳ ଓଠରୁ ପଦେ
ବଉଳ ଓଠରୁ ପଦେ
ଅଳସୀ ପାହାନ୍ତି ଢଳି ଢଳି ଗଲା
ଗୋଲାପି ଚିଠିକୁ ଦେଇ
ଖୋଲି ଦେଲି ଯେବେ ମନ ପକ୍ଷୀ ହୋଇ
ଉଡ଼ି ଗଲା କାନେ କହି ।
ବଉଳ ଓଠରୁ ସୁଧା ବରଷାରେ
ଯେତିକି ମେଦିନୀ ପ୍ରୀତ
ତୋ ମଧୁ ପାନରେ ଝରି ପଡେ ଆଜି
ମୋ ମନ ଅକୁହା ଗୀତ ।
ସୌରଭ ବିଛାଇ ଆମ୍ର ଉପବନେ
ବଉଳ ଡାକୁଛି ପାଖେ
ସାରା ରାତି ମୁହିଁ ଉଜାଗର ରହି
ସାଥେ ଯିବା ପାଇଁ ଲେଖେ ।
ବସନ୍ତ ଆସିଛି ଅବିର ନାଇବ
ଗୋଲାପି ଗଣ୍ଡରେ ତୋର
ମନ ଭିଜୁ ଥିବ ତୋ ରୂପ ରଙ୍ଗରେ
ପ୍ରେମରେ ଥରକୁ ଥର ।
ନାଚି ଉଠୁଛି ଲୋ ଭାବ ବିହ୍ବଳରେ
ହୃଦୟ ତରଣୀ ମୋର
ହଳଦୀ ବସନ୍ତ ଦେଖି ଦେଲି ଯେବେ
ଭାସିଲା ଯୌବନ ତୋର ।
କୃଷ୍ଣଚୂଡ଼ା ପୁଷ୍ପ ଗଭା ସଜାଡିଛି
ମୁକୁଳା କବରୀ ଦେଖି
ଇନ୍ଦୁ ଜୋଛନାରୁ ଚୋରାଇ ରଖିଛି
କଳଙ୍କ ଦାଗରୁ ବାଛି ।
ଝରା ବଉଳରୁ ଆଞ୍ଜୁଳା ଆଞ୍ଜୁଳା
ଉପହାର ଦେବି ତୋତେ
ସାଇତି ରଖିବୁ ବାସ ରାତି ପାଇଁ
ସ୍ମୃତି ପାରିବୁ ଲୋ ରାତେ ।
ପୌଷ ମାଘ ଶୀତ ଧୀରେ ଧୀରେ ଚଳେ
ବସନ୍ତର ଆଗମନେ
ତୋ ପାଦ ନୁପୁର ଉନ୍ମାଦ ଝଙ୍କାର
ପ୍ରତିକ୍ଷଣ ବାଜେ କାନେ ।