ପ୍ରେମ ନୁହେଁ ପାପ

ପ୍ରେମ ତ ପବିତ୍ର ପ୍ରେମ ତ ଶାଶ୍ବତ 

         ପ୍ରେମ ନୁହେଁ ଏକ ପାପ,

ପ୍ରେମ ଚିରସ୍ରୋତା ସ୍ନେହର କବିତା

         ମମତାର ମଧୁ ଗପ ।

ପ୍ରେମ ବୁଝେ ନାହିଁ  ଧନୀ କି ଗରିବ

        ବୁଝେନି ଅଜାତି ଜାତି,

ପ୍ରେମ ନୁହେଁ ପାପ  ପୂଣ୍ୟରୁ ଅମାପ

          ଅହିସାବ ଲାଭ କ୍ଷତି ।

ପ୍ରେମକୁ ଅଜଣା  ପ୍ରେମର ଠିକଣା

          ସ୍ଥାନ କାଳ ପାତ୍ର ପତି,

ବୁଝେ ନାହିଁ ପ୍ରେମ ସୁନାମ ଦୁର୍ନାମ

          ନିନ୍ଦା ପ୍ରଶଂସାର ଗତି ।

ପ୍ରେମେ ନାହିଁ ମନ୍ଦ କପଟ କି ଛନ୍ଦ

         ନଥାଏ ପ୍ରେମରେ ପାପ,

ପ୍ରେମ ସତ୍ୟ ଶିବ  ସୁନ୍ଦରର ଭାବ

         ହୃଦୟର ଲଘୁ ଚାପ ।

ନାହିଁ ହିଂସା ଈର୍ଷା  କ୍ରୋଧ ଅଗ୍ନି ବର୍ଷା

          ଅବିଶ୍ବାସ ଅନୁତାପ,

ନାହିଁ ଘୃଣା ମିଥ୍ୟା  ଅକଥାର ବ୍ୟଥା

       ପ୍ରେମ ନୁହେଁ ଏକ ପାପ ।।