Library
Profile
ଚିଲିକା
ଚିଲିକା
ସାରା ସଂସାର ର ସୌନ୍ଦର୍ଯ୍ୟ ତୋ'ଠି
ତୁ' ଲୋ ସୁନ୍ଦରୀ ଚିଲିକା ,
ତୋ'ପାଇଁ ଭାବୁକ ଭାବେ ଯେତେ ବେଶି
ଭାବୁ ଥାଏ ତା'ଠୁ ଅଧିକା ।
ନୀଳ ସାଗର ର ନୀଳିମାରେ ଭିଜି
ନୀଳାମ୍ବୁ ତୋ କାୟା , ମନ ,
ଦେଶ ବିଦେଶର ପକ୍ଷୀଙ୍କ ଆଦର
ତୋର ସେଇ ପକ୍ଷୀବନ ।
କାୟାରେ ତୋହର କୁଢ଼ କୁଢ଼ ଦ୍ବୀପ
ଲାଗେ ବଡ଼ ବଡ଼ କୁଦ ,
ପାରି ହେଇ ଯାଏ ନୌ-ବଣିକ ଲୋ
ନାମ ହେଲା ପାରିକୁଦ ।
ମାଲ୍ ବୋହି ଆଣି ଠୁଳ କରେ ଯେଠି
ନାମ ଦେଲା ଜାଣି ମାଲୁଦ ,
ତୀରେ କାଳୀଜାଈ ପ୍ରତ୍ୟେକ୍ଷ ଦେବୀ ଲୋ
କାହାଣୀ ତା' ବଡ଼ ଦୁଃଖଦ ।
ଦୂରୁ ଉଡ଼ି ଆସି ପକ୍ଷୀ ମା
ନେ ଯହିଁ
ରଚନ୍ତି ନିଜ ନିଜ ନୀଡ଼ ,
କଥା ଅଛି ପକ୍ଷୀ ହଗି ଗଢ଼ିଛନ୍ତି
ଚଢ଼େଇ ହଗା ପାହାଡ଼ ।
ଅନତି ଦୂର ରୁ ଦିଶେଲୋ ଚିଲିକା
ମାମୁଁ ଭଣଜାର ପାହାଡ଼,
ପାଖେ ଛୁଇଁଛି ଲୋ ନୀଳ ସାଗର କୁ
ସପେଟା ପରି ତୋ ଆକାର ।
ନୁହେଁ ବି ମଧୁର ନୁହେଁ ବି ଲୁଣିଆ
କ୍ଷାର କ୍ଷାର ଲାଗେ ତୋ ଜଳ ,
ଏସିଆ ରେ ବଡ଼ ଲବଣ ହ୍ରଦ ତୁ
ବିରାଟ ପର୍ଯ୍ୟଟନ ସ୍ଥଳ ।
ବର୍ଣ୍ଣମାଳା ସିନା ନିଅଣ୍ଟ ପଡ଼ୁଛି
ବର୍ଣ୍ଣିବାକୁ ତୋର ଏ ଗାଥା ,
ଇତିହାସ ପଛେ ଇତି କରି ଦେଉ
ଲେଖକ ଲେଖୁ ଥିବ କଥା ।।
