ସରଗର ସୁଖ ନରକର ଦୁଃଖ

ସରଗର ସୁଖ ଏଇଠି ହେ ପ୍ରଭୁ

     ନରକର ଦୁଃଖ ଏଇଠି

ସଂସାର ଜଞ୍ଜାଳେ ସୁଖ ଆଉ ଦୁଃଖ

     ଭରିଛୁ ଯେମିତି ଏକାଠି

ଜୀବ, ପାପ ପୁଣ୍ୟ ଭୋଗେ ଯେଉଁଠି ।

ସତ୍ତ୍ୱ, ରଜ,ତମ ଏ ତିନି ଗୁଣକୁ

     ଭରିଛ ମଣିଷ ଜୀବନେ

ସତ୍ତ୍ୱ ଗୁଣେ ଜୀବ ଲଭେ ସତସଙ୍ଗ

     ବିଚରେ ଶାନ୍ତିର ବିପିନେ

ସେଇ ଶାନ୍ତି ବନ ସରଗ ସମାନ

     ଆଉ ସ୍ୱର୍ଗ ସୁଖ କେଉଁଠି ।

ରଜ,ତମ ଗୁଣ ବଡ଼ ବେଇମାନ

     ଜୀବନକୁ କରେ ଅସାର

କ୍ଷଣିକ ସୁଖରେ ମଜ୍ଜି ଏ ଜୀବରେ

     ପରେ ପାଏ ଦୁଃଖ ସାଗର

ସେ ଦୁଃଖ ସାଗରେ ହଜାଇ ସତ୍ତାରେ

     ଭୋଗେ ନରକ ସେଇଠି ।