ସପନର ଶେଷ
ସପନର ଶେଷ
ଜାଗ୍ରତେ ଚେତନ ଶୟନେ ସପନ
ମାନସ ଅବଚେତନ
ଛାୟାଚିତ୍ର ପ୍ରାୟେ ପ୍ରତ୍ୟକ୍ଷେ ଜୀବନ
ସକ୍ରିୟ ପ୍ରତିଫଳନ ।
ବାସ୍ତବ ନୁହଁଇ ଯଦିଓ ସପନ
ଅବଶ୍ୟ ପ୍ରଭାବଶାଳୀ
ହୋଇପାରେ ସତ୍ୟ ନିକଟ ଭବିଷ୍ୟେ
ସ୍ୱପ୍ନଫଳ ଯାଏ ଫଳି ।
ସହଜ ହୁଅଇ ଅସମ୍ଭବ କଥା
ମିଳେ ସମାଧାନ ସୂତ୍ର
କାବ୍ୟ କବିତାରେ କଳ୍ପନା ବିଳାସେ
ଭାବ ହୁଏ ଉଜାଗର ।
ମଣିଷ ଜୀବନେ ଜୀଇଥିଲା ଯାଏ
ସ୍ୱପ୍ନ ସହ ଭେଟଘାଟ
ଅତି ଆପଣାର ସୁଖ ଅବା ଦୁଃଖେ
ରହସ୍ୟ ସ୍ୱପ୍ନ ବୃତ୍ତାନ୍ତ ।
ଅନ୍ଧକାର କାରା ଲୈ।ହର ଶୃଙ୍ଖଳ
ମାନେନା ବାଧା ବନ୍ଧନ
ମୁକ୍ତି ର ଆନନ୍ଦ କରେ ଉଜ୍ଜୀବିତ
ସୁଚରିତ କୃଷ୍ଣ ସ୍ୱପ୍ନ ।
ମୃତ୍ୟୁ ପରେ ସ୍ୱପ୍ନ ଫୁଟେ ଫୁଲ ପରି
ଉଜ୍ଜ୍ୱଳ ଆକାଶ ତାରା
ସପନର ଶେଷ ହୁଏ ନାହିଁ କେବେ
ଦିଏ ନାହିଁ ସ୍ୱପ୍ନ ଧରା ।