Library
Profile
ସଂକୀର୍ତ୍ତନ
ସଂକୀର୍ତ୍ତନ
ଏ ଭବ ସାଗରୁ ଉଦ୍ଧାର ନିମିତ୍ତେ
ଏକା ହରି ନାମ ସାର
ସେଇ ହରି ନାମ ମହିମା ଅପାର
ଖୋଲଇ ମକତି ଦ୍ୱାର ।
ସେଇ ନାମ ଜପି ଅଜାମିଳ ପାପୀ
ପାପରୁ ହେଲା ଉଦ୍ଧାର
ନାମ ସଂକୀର୍ତ୍ତନ ଶକ୍ତିଟି ଅନେକ
ଯମ ଦଣ୍ଡ କରେ ଦୂର ।
ଭବ ଭକତିରେ ଶ୍ରଦ୍ଧା ବିଶ୍ବାସରେ
ଜପୁ ଥିଲେ ନାମ ତାର
ଛୁଇଁ ପାରେ ନାହିଁ ନରକ ଯନ୍ତ୍ରଣା
ମିଳଇ ବୈକୁଣ୍ଠ ପୁର ।
ନାମ ସଂକୀର୍ତ୍ତନ ଶୁଭେ ଯେତେ ଦୂର
ପାପ ହେଇଯାଏ ଦୂର
ତାହାର ପ୍ରଭାବେ ଧର୍ମ ପ୍ରାପ୍ତ ହୁଏ
ପୁଣ୍ୟ ମିଳଇ ଅପାର ।
ଯମ କାଳ ଦାଣ୍ଡ ଫାଶରୁ ନିସ୍ତାର
ହରେ ରାମ ନାମ ସାର
କୋଟି ଜନ୍ମ ପାପ କ୍ଷୟ ହୋଇଯାଏ
ନାମଟି ଥିଲେ ତୁଣ୍ଡର ।
ଯେତେ ବଡ ପାପୀ ହେଉ ସେ ସଂସାରେ
ମୁକ୍ତି ଅନିର୍ବାଯ୍ୟ ତାର
ନାମ ସଂକୀର୍ତ୍ତନ ପ୍ରଭାବ ଏମିତି
କ୍ଷଣିକେ ପାପ ଅନ୍ତର ।
ଏ କଳି ଯୁଗରେ ନାମ ସଂକୀର୍ତ୍ତନେ
ନାମ ରସାମୃତ ସାର
କୃଷ୍ଣ ନାମ ରସାମୃତ ପାନ କରି
ମୁକତି ଲଭନ୍ତି ନର ।
ନାମ ସଂକୀର୍ତ୍ତନ ଠାରୁ ବଡ ଆଉ
କିଛି ନାହିଁ ଜଗତର
ପୁଣ୍ୟର ପସରା ଗତି ମୁକ୍ତି ଦାତା
ଧର୍ମର ସେ ଗନ୍ତାଗର ।
ଯେଉଠି ସଂକୀର୍ତ୍ତନ ହୁଏ ତ ସେଠି
ଝରୁଥାଏ ପୁଣ୍ୟ ଝର
ପାପୀ ହେଉ ଅବା ହେଉ ସିଏ ତପୀ
ଭବରୁ ପାଏ ଉଦ୍ଧାର ।
ସେ ହରି ଚରଣେ ନେଉଛି ଆଶ୍ରୟ
କରୁଛି କୋଟି ଜୁହାର
ଏ ଭବ ସାଗର କଷ୍ଟରୁ ଉଦ୍ଧାର
ଆହେ ପ୍ରଭୁ ଚକ୍ରଧର ।
