Library
ସ୍ନେହ ମମତାର ଅଲିଭା ସାକ୍ଷୀ
ସ୍ନେହ ମମତାର ଅଲିଭା ସାକ୍ଷୀ
ସମ୍ପର୍କ ସ୍ରୋତରେ ଜୀବନ ଭାସୁଛି
ସମ୍ବୋଧନ ସୂତ୍ର ଧରି
ଭାଇ ଭଉଣୀର ସମ୍ପର୍କ ନିଆରା
କିଏ ହେବ ତାହା ସରି ।
କିମ୍ବଦନ୍ତୀ ଠାରୁ ପୁରାଣ ପୃଷ୍ଠା ଯେ
ଭାଇ ଭଗ୍ନୀ ପ୍ରେମ କହେ
ଅପୂର୍ବ ଭାବର ପବିତ୍ର ଛନ୍ଦର
ମାଧୁରିମା ଖେଳିଯାଏ ।
ଶ୍ରାବଣ ପୂର୍ଣ୍ଣିମା ବଳଦେବ ଜନ୍ମ
ଗୋ ମାତାଙ୍କ ପୂଜାର୍ଚ୍ଚନା
ଆମ ସଂସ୍କୃତିର ନିବିଡ ଗାଥା ଯେ
ଦେଉ ଥାଏ ଯେ ପ୍ରେରଣା ।
ଆମ ସଂସ୍କୃତିର ମୁଖ୍ୟ ଧାରା ପରା
ଶ୍ରୀ ଜଗନ୍ନାଥ ସଂସ୍କୃତି
ଶ୍ରୀ ମନ୍ଦିରେ ଗେହ୍ଲି ସୁଭଦ୍ରା ଯେ
ଜଗା ବଳିଆ ଭଉଣୀ ।
ଶ୍ରାବଣ ପୂର୍ଣ୍ଣିମା ଭାଇ ଭଉଣୀ ର
ଅମୃତ ପ୍ରେମ ବାହକ
ଏହି ପୂର୍ଣ୍ଣିମା ରେ ରାକ୍ଷୀ ରେ ମଣ୍ଡିତ
ଜଗା ବଳିଆ ଙ୍କ ହାତ ।
ଭାଇ ପାଇଁ ରାକ୍ଷୀ ନୁହେଁ ଡୋରଟିଏ
ଅତୁଟ ମହାର୍ଘ ଡୋର
ସ୍ନେହ ମମତା ଅଲିଭା ସ୍ଵାକ୍ଷର
ଚିରନ୍ତନ ତାର ସ୍ଵର ।
ସାନ ଭଉଣୀ ଭଉଣୀର ବଡ଼ ଭାଇ ପରା
କର୍ମ ପ୍ରେରଣାର ଧାରା
ବଡ଼ ଭଉଣୀ ର ଜୀବନ ଆଧାର
ଅଟେ ସୁଖର ପସରା ।
ବରଷକେ ଥରେ ରାକ୍ଷୀ ଆସିଥାଏ
ଅଲିଭା ସାକ୍ଷୀଟେ ହୋଇ
ସ୍ନେହ ମମତା ର ସ୍ଵର ଝଙ୍କାରକୁ
ଦୁନିଆରେ ବାଣ୍ଟୁ ଥାଇ ।
ଭାଇର ହାତର ରେଶମୀ ରାକ୍ଷୀଟି
ଭଉଣୀ ପ୍ରେମରେ ଭରା
ଅକୁହା ଅଦେଖା ଶୁଭ ବାରତାରେ
ରେଶମୀ ରାକ୍ଷୀଟି ପୁରା ।
ରାକ୍ଷୀ ଆସୁଅଛି ଭାଇର ହାତରେ
ଅଲିଭା ସାକ୍ଷୀ ଟେ ହୋଇ
ସ୍ମୃତିରେ ଫୁଲରେ ରାକ୍ଷୀ ସାଜି ଅଛି
ପ୍ରୀତିର ବାରତା ଦେଇ ।
ଭାଇ ହାତର ସେ ରେଶମୀ ରାକ୍ଷୀ ରେ
ସୋହାଗ ସମ୍ମାନ ଭରା
ଦୁହେଁ ଦୁହିଁଙ୍କର ମନ ଦରପଣେ
ଦୁହିଁଙ୍କୁ ବୁଝନ୍ତି ପରା ।
ଇଶ୍ଵର ଦତ୍ତ ଏ ସଂପର୍କ ସେତୁ ରେ
ରାକ୍ଷୀ ଟି ଯେ ବାନ୍ଧି ହେଲେ
ସ୍ନେହ ମମତା ର ଅଲିଭା ସାକ୍ଷୀ ଟେ
ହୋଇ ସଦା ରହିଯାଏ।
