ସନ୍ଧ୍ୟାକାଳ

ବାରୁଣୀ ତଟରେ ଲୁଚି ଗଲେଣି ରବି 

କି ସୁନ୍ଦର ଦିଶେ ସେଇ ଲୋହିତ ଛବି l

ଆସିଲାଣି ସନ୍ଧ୍ୟାକାଳ ଧରଣୀ ବୁକେ 

ଫେରିଲେଣି ପକ୍ଷୀଦଳ ବାସର ମୁଖେ l

ମୁହଁ ସଂଜ ଅନ୍ଧାରରେ ପ୍ରକୃତି ରାଣୀ 

ଯାମିନୀର ଅପେକ୍ଷାରେ ସଜ ହେଲାଣି l

ଶୁଭିଲାଣି ଦେବାଳୟେ ଘଣ୍ଟ ଆଳତି 

ଜଳିଲାଣି ସନ୍ଧ୍ୟା ଦୀପ ସଜଳେ ଅତି l

ଫେରିଲେଣି ଗୃହେ ନର ମୁହଁ ଅନ୍ଧାରେ 

ସାରି ନିଜ କର୍ମ ସବୁ ନିଜ ବାଟରେ l

ଦିଶିଲେଣି ତାରାପୁଞ୍ଜ ନୀଳ ଗଗନେ 

ଉଇଁଲେଣି ନିଶାକର ଧ୍ୟାନ ମଗନେ l

ବହେ ମୃଦୁ ସମୀରଣ ପ୍ରଶାନ୍ତ ଚିତ୍ତେ

ଭ୍ରମିଲେଣି ଶୃଗାଳ ଗାଁ ଗହୀର ପଥେ l

ଅଦୂର ପଲ୍ଲୀରୁ ଦିଶେ ମିଞ୍ଜି ମିଞ୍ଜି ଆଲୋକ 

ଅନ୍ଧାରରେ ଛାଇଲାଣି ଗାଁ ଗଣ୍ଡା ମୂଲକ l

ଦୂର ତାଳବଣ ପୁଣି ଫସଲ କ୍ଷେତ 

ମୁହଁ ଅନ୍ଧାରରେ ଧିରେ ହେଲେଣି ଅନ୍ତ l

ଫେରିଲେଣି ବାଳକେ ଛାଡି କ୍ରୀଡାଙ୍ଗନ 

ପ୍ରକୃତି କୋଳରେ ଦେଖି ସନ୍ଧ୍ୟା ଆଗମନ l

ଫେରିଲେଣି ଚଷା ଭାଇ କ୍ଷେତରୁ ତାଙ୍କର 

ମୁହଁ ସଂଜ ଅନ୍ଧାରରେ ହୋଇ ତରତର l

ଦିବସର କର୍ମ କ୍ଳାନ୍ତେ ପ୍ରକୃତି ରାଣୀ 

ବିଶ୍ରାମ ପଥରେ ଧିରେ ନିଦ୍ରା ଗଲାଣି l