ସନାତନ ଧର୍ମ

ସନାତନ ଧର୍ମ ଅନନ୍ତ ଶାଶ୍ୱତ

ନାହିଁ ଯାର ଆଦ୍ୟ ଅନ୍ତ,

ଥିଲା ଅଛି ରହିଥିବ ଭାବିଷ୍ୟତେ

ଥିବାଯାଏଁ ସୂର୍ଯ୍ୟ ଚନ୍ଦ୍ର ।

ସର୍ବ ପୁରାତନ ଧର୍ମ ସନାତନ

ମାନବତାର ସେ ମୂଳ,

ବିଜ୍ଞାନକୁ ନେଇ ହୋଇଛି ଗଠିତ

ସଭିଙ୍କୁ ଯୋଗାଏ ବଳ ।

'ସ' ରେ ସତ୍ୟ, 'ନ' ରେ ନ୍ୟାୟ

'ଆ' ରେ ଅଟଇ ଆସ୍ଥା,

'ତ' ରେ ତପସ୍ୟା, ନ' ରେ ନିଷ୍ଠା

ଏହା ସନାତନ ବାର୍ତ୍ତା ।

ଆତ୍ମା ନୁହେଁ ମର, ଅଟଇ ଅମର

ପ୍ରତି ଘଟେ କରେ ବାସ,

ସେଥିପାଇଁ ପ୍ରତି ଜୀବଙ୍କୁ ସମ୍ମାନ

ଦେଇଥାଏ ଏ ଅବଶ୍ୟ ।

ପଞ୍ଚଭୂତ ଅଟେ ଆମର ଦେବତା

ମନେଥାଉ ଦିବା ନିଶି,

ଆତ୍ମା ରହିଥାଏ ଶରୀର ମରଇ

ପଞ୍ଚଭୂତେ ଯାଏ ମିଶି ।

ଅଗ୍ନିଙ୍କ ରୂପରେ ରହିଛନ୍ତି ସୂର୍ଯ୍ୟ

ମୂର୍ତ୍ତିକା ରୂପେ ଗଣେଶ,

ଜଳ ମଧ୍ୟେ ଶିବ, ବାୟୁ ମଧ୍ୟେ ଦୁର୍ଗା

ଆକାଶରେ ହୃଷୀକେଶ ।

ସନାତନ ଧର୍ମେ ଆତ୍ମାର ତତ୍ତ୍ୱ

ପରମାତ୍ମାଙ୍କର ସ୍ଥିତି,

ବିଶ୍ୱଶାନ୍ତି ବିଶ୍ୱକଲ୍ୟାଣ ପାଇଁ

କାର୍ଯ୍ୟ କରିଥାଏ ନିତି ।

ଅନୁଶାସନରେ ଜୀବନକୁ ବାନ୍ଧେ

ଶୃଙ୍ଖଳିତ ହୁଏ ମନ,

ଜୀବନରେ ଭରେ ଶାନ୍ତି ଓ ସମୃଦ୍ଧି

ନୀତିନିଷ୍ଠ ହୁଏ ଜନ ।

ସୁସ୍ଥ ନିରାମୟ ଜୀବନର କଳା

ପ୍ରାପ୍ତି ହୁଏ ଆଜୀବନ,

ପୁରୁଷାର୍ଥ ମୋକ୍ଷ ପ୍ରାପ୍ତିର କୌଶଳ

ଶିକ୍ଷା ଦିଏ, ସନାତନ ।