ମୋ ଦେଶ ମହାନ

କନ୍ୟାକୁମାରୀରୁ କାରାକୋରମ୍ ଯାଏ

ବିଶାଳ ମୋହର ରାଷ୍ଟ୍ର,

ଅରୁଣାଚଳରୁ ଆଜମେର୍ ଯାଏ

ପରିବ୍ୟାପ୍ତ ତାର ପୃଷ୍ଠ !

ସହିଛି ଅନେକ ଘାତ ପ୍ରତିଘାତ

କେବେ ସେ ପଡିନି ଥକି,

ପୂର୍ବରୁ ଅଧିକ ସୁଦୃଢ଼ ହୋଇଛି

ଶ୍ରେଷ୍ଠତା ରହିଛି ବାକି !  

ପଞ୍ଚସ୍ତରୀତମ ମୁକ୍ତିର ବରଷ

ପାଳନ କରୁଛି ଦେଶ,

ଭାରତ ମାତାର ପ୍ରତି ଜନଙ୍କର

ମୁଖରୁ ଝରୁଛି ହସ !

ବରଷୁ ବରଷ ଅନେକ ବରଷ

ସମୟ ଗଲାଣି ବିତି,

ବିକାଶ ବଢୁଛି ,ଦେଶ ବଦଳୁଛି,

ସୁଦୃଢ଼ ହେଉଛି ଭିତ୍ତି !

ବିକାଶ ମାର୍ଗରେ ଦେଶ ଗତିଶୀଳ, 

ବଢୁଛି ଭାରତ ମାନ,

ଦେଶରୁ ବିଦେଶ ସାରା ବିଶ୍ୱବାସୀ

କରୁଛନ୍ତି ଜୟଗାନ !

ଦେଶମାତୃକାର ସୁରକ୍ଷା ନିମନ୍ତେ

କର୍ମ କଲେ ନିରନ୍ତର,

ଅଖଣ୍ଡ ଭାରତ ସ୍ୱପ୍ନ ହେବ ସତ,

ବିସ୍ମିତ ହେବ ସଂସାର !

ରାଷ୍ଟ୍ରହିତ ପାଇଁ ଜୀଇଁବା ମରିବା,

ରାଷ୍ଟ୍ର ଅଟେ ସର୍ବୋପରି,

ଅନ୍ୟଥା ଏ ଜନ୍ମ ନିଷ୍ଫଳ ହୋଇବ,

ଦେଖୁଛନ୍ତି ନରହରି !

ରାଷ୍ଟ୍ରପ୍ରେମ ଶାନ୍ତି ମୈତ୍ରୀ ମନେ ବହି

ରାଷ୍ଟ୍ରଭକ୍ତି ଗୀତ ଗାଇ,

ଜାତୀୟ ଉତ୍ସବ କରିବା ପାଳନ

ସଭିଏଁ ଏକତ୍ର ହୋଇ !