ସମୟ

ସମୟ ମାନେ କଣ ଜନ୍ମ ନା ମରଣ

ନା ଦୁହିଁଙ୍କ ବ୍ୟବଧାନ ଭିତରେ ଗଣନ

ନା ଦିନ ନା ରାତି ଭିତରେ ଅପରାହ୍ନ

ଛାଇ ଦେଖି ସମୟ ସ୍ଥିର କହୁଥିଲେ କେହି 

କେବେ କମ୍ପାସ ବ୍ୟବହାର ଥିଲା ଜଳ ସ୍ତରେ

ଏବେ ସମୟ ଛାଇ ଲେଉଟିଲା ପରେ

ଗୋଠରୁ ଗାଈଗୋରୁ ଫେରେ ଗୋଧୂଳିରେ

ପୁଣି ଛାଇ ନିଦ ଶେଷ ଶବ୍ଦ କେବେ ଅବ୍ଦରେ

ସମୟ ସଂଜ୍ଞା କଣ ଜାଣିବା ଭିତରେ

ମନ ମୁନ ଚେତନା ଚୈତନ୍ୟ ସାରଣୀରେ

ସମୟ ଛଟପଟ ହୁଏ ମାଳିକା ଭିତରେ

ଆମ ଗାଁ ପଦ୍ମ ପୋଖରୀ ଭିତରେ

ଜେଜେବାପା ମଶାଣୀ ଜୁଇରେ ଶୋଇଲା ପରେ

ଜେଜୀମା ବୃଦ୍ଧାଶ୍ରମରେ ଠିକଣା ଲେଖିଲା କାଳେ

ସମୟ ବି ଆସେ ଛପି ଛପି ଆମ୍ବ ବଉଳିବା ବେଳେ

ହୁଏତ ସମୟ ଆସେ ସୁନେଲି ସକାଳେ

ଖରା ବର୍ଷା ଶୀତ ଋତୁ ଭିତରେ

 ଶରତ ହେମନ୍ତ ବସନ୍ତ ଝୁରୁ ଥିବା କାଳେ

କୋଇଲି କୁହୁ କାଉର ରାଉ ରାଉ

ବାପାଙ୍କ ପେଜୁଆ ଆଖି ବୋଉର ପଣତ ସାକ୍ଷୀ

ଉଷୁନା ଧାନ ଗଜା ହେବା ସକାଳେ

ନା ଚନ୍ଦ୍ର ଗ୍ରହଣ ଓ ସୂର୍ଯ୍ୟ ପରାଗ ବେଳେ

ସମୟ ଆଜିକାଲି ଭାରି ଲୁଚକାଳି ଖେଳେ

 ସତରେ ମିତରେ ଖରା ଛାଇ ଭିତରେ ଭିତରେ ।