ସମୟ ସୁଅରେ ଜୀବନ

ଦେଖିନାହଁ ମୋତେ ଯଦି

ଦେଖିନିଅ ଆଖି ଭରି ଆଜି

କେମିତି ସୁଖର ଢେଉ 

ମୋ ପାଖରୁ ଯାଏ ହଜି ହଜି I

ଦେହେ ମୋର ସଞ୍ଚରିଛି

କେତେ କେତେ ପୀଡା

ଦେଖୁନି ସପନ ଆଉ

ଆଖି ମୋର ହେଲାଣି ଅଲୋଡା I

ଦୟାକରି ମୋ ରକ୍ତରେ

ଆଉଥରେ ଖେଳନାହିଁ ହୋଲି

ଶୁଣାଅନି ମୋ କାନରେ

ଆଉଥରେ ପକ୍ଷୀର କାକଳି I

ଭିଜାଅନି ଦେହ ମୋର

ଆଖିର ଲୁହରେ

ମୋତେ ଆଜି ଭାସିବାକୁ 

ଦିଅଥରେ ସମୟ ସୁଅରେ I

ମୋ ଆତ୍ମାର ଡାକ ଯଦି

ପଡିନାହିଁ କାନରେ କାହାର

ବ୍ୟସ୍ତ ମୁଁ ହେଉନି ଆଜି

ଯାଉଛି ମୁଁ ନୀରବରେ 

ନିଜହାତେ ତିଆରିବି ଲୁହର ସହର I

ଆକାଶେ ବାରିଦ ଖେଳ 

ଆଖିଲୁହେ ଭିଜି ଭିଜି ଦେଖେ

ଦୂର ଦିଗବଳୟ ମୋତେ

ନୀରବରେ ହାତ ଠାରି ଡାକେ I