ସମୟ ସୁଅରେ ଆଜିର ନବବର୍ଷ

ବିସ୍ମୃତି ଗର୍ଭରେ ଅତୀତ ଲୁଚଇ

    ସମୟ ସୁଅରେ ବର୍ଷ ,

ନଶ୍ୱର ଦେହଟା କଡ଼ ଲେଉଟାଏ

     ଦେଇ ନୂତନକୁ ସ୍ପର୍ଶ ।

ଜାନୟାରୀ ମାସ ପହିଲା ତାରିଖ

     ଆସଇ ନୂଆ ବରଷ ,

ଆନନ୍ଦ, ଉଲ୍ଲାସେ ବରଣ କରନ୍ତି

     ବର୍ଷକୁ କରି ସରସ। 

ମୋବାଇଲ୍ ଆଉ  ୱାଟସ୍ ଆପ୍ ରେ

    ଆସେ ଅସଂଖ୍ୟ ମେସେଜ,

ହେପିନ୍ୟୁ—ଇୟର୍ ଶୁଭେଚ୍ଛା ବାର୍ତ୍ତାରେ

     ଉତ୍ଫୁଲ୍ଲ ହୁଏ ସମାଜ ।

ବାଣ —ତୁରଙ୍ଗରେ ମଦର ନିଶାରେ

     ଉତ୍ସୃଙ୍ଖଳ ପରିବେଶେ,

ବରଣ ହୁଅଇ   ନୂତନ ବରଷ

    ମଧ୍ୟ ରାତ୍ରି ଅବକାଶେ।

ଅମଣିଷ ଗୁଣେ  ଅବିବେକି ପଣେ

     ପ୍ରବଳ ଉତ୍ପାତ ହୋଇ ,

କେତେ ରଙ୍ଗ ଆଉ ଢଙ୍ଗରେ ନାଚନ୍ତି

     ସ୍ବାଗତ ବର୍ଷକୁ ନେଇ ।

ବର୍ତ୍ତମାନ ର 'ଶବଧାର' ଉପରେ

     ବସି ପାଳୁ ନବବର୍ଷ ,

କଣ ବା' ଶିଖୁଛି  ଉତ୍ତର ଦାୟଦ

     ଆହ୍ବାନ କରି ବରଷ ।

ଯିବ ପୁରାତନ  ଆସିବ ନୂତନ

    ଏହାତ ରହିଛି ରୀତି ,

ଭ୍ରମାନ୍ତକ ମାର୍ଗ ସତର୍କ କରାଏ

    ଆଗାମୀ ଜୀବନ ଗତି।

ସରାଫି ନିଶାରେ ଅର୍ଦ୍ଧନଗ୍ନ ନୃତ୍ୟେ

    ହତ୍ୟାକରି ସଂସ୍କାରକୁ ,

ମାନବିକତା କୁ ସ୍ୱାହା କରି ଦେଇ

    ପାଳୁଛୁ ନବ ବର୍ଷକୁ ।

ଜଗନ୍ନାଥ ଆମ ସାହିତ୍ୟ ସଂସ୍କୃତି

     ପ୍ରୀତି ମନ୍ଦାକିନୀ ଧାରା ,

ଶୁଭ୍ର ଚେତନାଟି ଉଜ୍ଜୀବିତ ହେଉ

     ସବୁରି ହୃଦୟେ ପରା ।

ଶୁଭ ଶଙ୍ଖ ବାଜୁ ପ୍ରତିଟି ସ୍ପନ୍ଦନେ

     ହେ ଉତ୍କଳୀୟ ସନ୍ତାନ ,

ଶୃଙ୍ଖଳିତ କର ସଭ୍ୟ ସମାଜକୁ  

     ବରଣ କରି ନୂତନ ।

ସମୟ ସୁଅରେ ଆଜି ନବ ବର୍ଷ

     କାଲି ପୁରୁଣା ହୋଇବ ,

ସଚେତନ ହେଲେ ଆଗାମୀ ଭବିଷ୍ୟ

     ସ୍ବର୍ଣ୍ଣାଭ ବର୍ଷ ପାଳିବ ।