ସମସ୍ୟା
ସମସ୍ୟା
ଅବିରତ ଯଦି ସମସ୍ୟା ଆସୁଛି ଶ୍ରାବଣ ବରଷା ପରି,
ମନେ ରଖିଥିବା ଜଗତର ନାଥ ଆସିବେ ଛତାଟି ଧରି |
ସବୁଠୁଁ ସହଜ ସବୁଠୁଁ ଜଟିଳ ଦୋଷ-ତ୍ରୁଟି ଖୋଜାଖୋଜି,
ପରଦୋଷ ଅତି ସହଜରେ ଦିଶେ ନିଜଦୋଷ ଯାଏ ହଜି |
ବିଫଳତା କେବେ ହରାଇ ଦେବନି ଥିବ ଯଦି ମନୋବଳ,
ସଫଳତା ନିଜେ ଗୋଡ଼େଇ ଆସିବ ଯାଚିଦେବ ମିଠାଫଳ |
ଆଶା ଅଭିଲାଷ ପ୍ରବଳ ହୋଇଲେ ମନ ଉଡ଼େ ଆକାଶରେ,
ହାର ମାନିଯିବା ନିଶ୍ଚିତ ହୋଇବ ଆକାଶକୁ ଛୁଇଁବାରେ |
ଦିନ ଆସେ ନୂଆନୂଆ ଆଶା ଆଉ କଳ୍ପନାକୁ ସାଥେନେଇ,
ଦିନଯାଏ ପୁଣି କେତେ ଅଭିଜ୍ଞତା ନୂଆ ଅନୁଭୂତି ଦେଇ |
ନିଶ୍ଵାସ ଛାଡ଼ିଲେ ପ୍ରାଣୀ ଶରୀରରୁ ପ୍ରାଣ ଛାଡ଼ିଥାଏ ଥରେ,
ବିଶ୍ଵାସ ଛାଡ଼ିଲେ ପ୍ରତି ମୁହୂର୍ତ୍ତରେ ଛଟପଟ ହୋଇମରେ |
ଆମସୁଖ ଦେଖି ଆତ୍ମା ହସେ ପୁଣି ଦୁଃଖରେ ବି ହସୁଥାଏ,
ଅନ୍ୟର ଦୁଃଖକୁ ଦୂରକଲେ ପ୍ରାଣୀ ଆତ୍ମା ଧନ୍ୟବାଦ ଦିଏ |
#ସିଧାକଥା