ସମସ୍ୟା ଆଉ ସଂପର୍କ

ଯେମିତି ଅଗଣିତ ଅସରନ୍ତି 

ସମାସ୍ୟାର ଆଉ ସଂପର୍କର 

ତନ୍ତୁରେ ତା'ର ହୃଦୟଟି ଗୁନ୍ଥା । 

କେଉଁଠି କିଏ ଟିକିଏ ଝିଙ୍କିନେଲେ 

ଛିଡ଼ିଯାଏ ତନ୍ତୁଟିଏ , 

ଚଟ୍ କରି ଝଟକାଟିଏ ଲାଗେ !

ଦଶଦିଶ ଦିଶେ ଗାଢ଼କଳା ! 

ଭାଙ୍ଗିଯାଏ ସଂପର୍କଟିଏ 

ଦୋହଲି ଯାଏ ତା'ର ସଂସାର ।

ଯେତେ ଲହୁ ଲୁହାଣ ହେଲେ ବି  

ସେ ଅଦୃଶ୍ୟ ଯନ୍ତ୍ରଣାକୁ  

କାହାକୁ ଦେଖାଇ ପାରେନି । 

ସମସ୍ୟାର ଆଉ ସଂପର୍କର ଦାସ ସିଏ 

ଜୀବନ ତା'ର ଏହାରି ଭିତରେ 

ଛନ୍ଦିହୋଇ ଅଣନିଃଶ୍ୱାସୀ । 

ଜୀବନର ଲକ୍ଷାଧିକ 

ସମସ୍ୟା ଆଉ ସୂକ୍ଷ୍ମ ସଂପର୍କ ସହ 

ତା'ର ଅବିଶ୍ରାନ୍ତ ଯୁଦ୍ଧ ଆଉ ପରାଜୟ ।

 

ତଥାପି ସେ ଲଢ଼ି ଚାଲିଛି ଅହରହ 

ଛୋଟ ସମସ୍ୟାଟିଏ ଦୂରକରି

ପୁରସ୍କାର ସ୍ୱରୂପ ପୁଣି ଏକ 

ବଡ଼ ସମସ୍ୟାକୁ ସେ ହାତେଇ ନେଉଛି ।

 

ଗୋଟିଏ ଭଙ୍ଗା ସଂପର୍କର 

ଧ୍ୱଂସସ୍ତୁପ ଉପରେ 

ନୂଆ ଏକ ସଂପର୍କର ଅଟାଳିକାଟିଏ 

ଗଢ଼ିବାକୁ ବୃଥା ପ୍ରୟାସ ସେ କରୁଛି ।